Footer

BANNER NEWS: COP naalarma iti umad-adu nga insidente ti panagbansag iti bus

STA. LUCIA, Ilocos Sur – Naalarma ti hepe ti polis ditoy iti umad-adu nga insidente ti panagbansag kadagiti bus a lumabas ditoy nga ili iti rabii.

Kinuna ni Police Inspector Lawrence Calub, hepe ti polis,  nga iti umuna a dua a bulan daytoy a tawen, addan pito a naireport a panakabansag ti bus a pakairamanan ti Santa Lucia Bus, Partas Trans ken Florida.

Naammuan nga awan pay ti naaresto nga akingapuanan kadagitoy a panagbansag.

Ti kaudian a pannakabansag ti maysa a bus bayat ti panagdaliasatna iti Barangay Vical idi 12:47 ti rabii ti Pebrero 13 ti kakaruan ta natay ti drayber gapu iti linak-amna a sugat gapuanan ti panagdisso ti dakkel a bato iti barukongna.

Segun iti konduktor ti bus a ni Benny Ramos, agdaldaliasat ti RCJ bus a minaneho ni June Cirilo Tacang, 27, baro, residente iti Vintar, Ilocos Norte iti nadakamat a barangay idi kellaat a nagparang ti traysikel a nagluganan dagiti suspek manipud iti laud nga agturong iti Candon City. Nagbusina ti drayber kas pammallaagna kadagiti dadduma a motorista ngem mapapati a nakapungtot ti back rider ti traysikel ket binansagna ti bus a nabuongan ti windshield ti lugan.

Mapapati a nagderetso ti bato iti barukong ti biktima.

Naitaray ni Tacang iti Sta. Lucia District Hospital ngem naideklara a dead on arrival.

Nupay kasta, awan ti naireport a nadunor a pasahero.

Sakbay ti insidente ditoy nga ili, maysa met a babai ti naireport a nadunor idi nabansag ti Partas Bus a naglugananna.

Nainaganan ti biktima a ni Rosemarie Callejo, 30, residente iti Barangay San Pedro, Narvacan, Ilocos Sur.

Iti panagimbestiga dagiti polis, agturturong iti abagatan a direksion ti Partas Bus a minaneho ni Salvador Querubin, 43, residente iti Pantay Tamurong, Caoayan, Ilocos Sur,  ket idi agdaldaliasat iti sentro ti Siudad ti Candon, binansag ti di nabigbig a tao ti lugan a nakabuongan ti maikatlo a tawa manipud iti sango.

Limsut ti bato a nakapuntaan ti biktima a nakatugaw iti dumpir ti tawa.

Naitaray ni Callejo iti ospital tapno maagasan.

Iti kallabes, adda met dagiti naireport a panagubor iti bus iti ili ti Santiago ken Sta. Maria.

Iti umuna a distrito, adda met naireport a panagubor iti bus iti Bantay, Ilocos Sur.#

Comments are closed.