Footer

Commitment iti seguridad dagiti foreign nationals, impasingked ti PNP regional director

SAN FERNANDO CITY – Impasingked ti regional director ti commitment ti kapolisan iti seguridad dagiti foreign nationals nga agnaed iti Region I bayat ti maysa a dialogo a naangay iti Masigasig Center ti police regional office ditoy idi Pebrero 9.

Kinuna ni Police Chief Supt. Franklin Jesus B. Bucayu, regional director, nga imbilinnan ti pannakadesignar dagiti liaison officers a madagdagus a kontaken dagiti foreign nationals no dumteng ti panagkasapulanda.

“Pagtalinaedentayo a nakalukat dagiti linia ti komunikasiontayo tapno nalakatayo a masolbar dagiti problema ken malapdan ti pannakapasamakda,” kinuna pay ni Bucayu.

Dagiti Koreano ken Indian nga agnaed iti Region I ti kaadduan a foreign nationals a timmabuno iti nasao a dialogo nga inrusat PRO1.

Kangrunaan a panggep ti dialogo ti panagtitimpuyog ti kapolisan ken dagiti foreign nationals para iti pannakasalaknib ken seguridad dagiti ganggannaet nga agnaed iti daytoy a rehion ken iti pannakaiwayat dagiti proactive measures a mangsolbar iti isyo ti kriminalidad kadagiti foreign nationals.

Iti nasao a dialogo, impresenta ti PRO1 intelligence division dagiti istatistika dagiti insidente a nakainbolbaran dagiti foreign nationals iti Region I ken ti pannakaipasdek ti Special Liaising Posts para kadagiti ganggannaet ken iti plano ti seguridad para kadagiti turista a naawagan iti “Bantay Turista”.

Iti open forum a nagbalin a moderator ni Supt. Julius C. Suriben, deputy chief ti intelligence division, maysa nga Indian national nga agnaed iti Dagupan City ti nangibingay iti pammatina nga adda dagiti kriminal nga elemento nga agisaysayangkat iti robbery/hold-up a kangrunaan a puntiriada dagiti ganggannaet, kasta met ti pammaliiwna nga adda dagiti nabiktima a kadaraanna nga agkitakit a mangireport iti napasamak kadagiti polis.

Karaman kadagiti limtuad iti open forum ti panangbuangay dagiti foreign nationals iti organisasionda ken iti pannakadesignar dagiti liaison officersda para iti nasaysayud ken nadardaras a koordinasion iti polis; pannakaireport dagiti international fugitives kadagiti law enforcement agencies; ti posible a panagaplikarda iti security detail; panagkiddawda iti panagpatrolia dagiti polis iti sumagmamano a masnop a lugar; ken iti pannakaipasdek ti closed circuit television (CCTVs) kadagiti business establishments a kukua dagitoy a foreign nationals.

Kinuna ni Bucayu a panggepna ti pannakaisayangkat pay iti ad-adu a dialogo kadagiti foreign nationals iti masakbayan a pakaimbitaran pay dagiti pannakabagi ti Bureau of Immigration and Deportation ken dadduma a maseknan nga ahensia ti gobierno.#

Comments are closed.