Footer

EDITORIAL: Masapul a matunton ti kinapudno

Naitabon ni dati Defense Secretary Angelo Reyes babaen ti seremonia a maited laeng kadagiti bannuar. Iti mata dagiti gagayyemna, nakadkadkaduana ken dagiti mangipatpateg kenkuana, maysa a bannuar ni Reyes, maraem nga opisial, mapagtalkan a dadaulo ti gobierno.

Ala, saantayo a kontraen ti kinuna ti maysa nga anakna a natay ti amana a maysa a nadayaw ken maraem a tao, ket dayta ti dida maagaw kadakuada.

Ngem agbibitin dagiti saludsod: Pudno kadi a tunggal adda maipatugaw a baro a hepe ti Armed Forces of the Philippines, adda “pasarabona” a kuarta ken no adda agretiro nga AFP chief of staff, adda “pabalonna” a kuarta? Pudno kadi a nakarudkod dagiti pondo nga inted ti United Nations a para kadagiti maibaon a soldado a tumulong a mangtagiben iti urnos ken talna kadagiti nariribuk a pagilian?

Nagsimple dagiti saludsod. Nagsimple met koma dagiti sungbat: wen wenno saan! No wen, no agpayso nga adda korapsion, yanna dagiti ebidensia? Rumbeng a maidatag itan dagiti ebidensia a mangitudo kadagiti opisial a nangisawsaw iti ramayda iti pondo ti armed forces ti pagilian.

Ngem ditoy met ti lumtuadan pay ti sabali a saludsod: apay a kinettel ni Gen. Angelo Reyes ti biagna?

Kuna dagiti mangisakit kenkuana: saanna a nadaeran dagiti pannakaibabain a linak-amna kadagiti senador a di man la nangited kenkuana iti respeto a rumbeng koma a maited iti kas kenkuana a nagbalin a nangato nga opisial ti militar ken iti gobierno.

Kuna ti dadduma a gagayyemna a soldado: tapno mailisina iti dakdakkel pay a pannakadadael ti institusion nga impatpategna.

Kuna met dagiti dadduma a mangipatpateg kenkuana: tapno mailasa ti pamiliana iti ad-adu pay a pannakaibabain.

Aniaman ti gapuna, makunami met nga intugotna iti tanem dagiti adu a saludsod a makaited koma iti paglawagan kadagiti alegasion ti korapsion iti military establishment. Iti ipapatayna, nabati dagiti umili nga agngatangata no pudno dagiti alegasion ti konbersion ken pasalubong ken pabaon dagiti hepe ti AFP kasta met dagiti mapapati a mapukpukaw a pondo manipud iti United Nations a maited koma kadagiti kailiantayo a soldado a naibaon a tumulong iti pannakatagiben ti urnos ken talna kas peacekeeping forces kadagiti nariribuk a pagilian.

Gapu kadagitoy a napasamak, idagadagmi pay a saan koma a maisardeng ti panagpalutpot mainaig iti mapapati a korapsion iti military establishment iti baet nga adda maysa a ‘nagsakripisio’  iti panangtunton iti kinapudno. Kasapulan a mabukitkitan ti kinapudno, uray asino ti dungparenna, uray asino ti agannay ken uray no nangangato nga opisial ti madalapus.

Lagipentayo koma dagiti ginasut a biag dagiti kadaraantayo a soldado a naipatli ti biagda iti gubatan, , saan a gapu ta agkurkurang iti kabaelanda a makirupak no di gapu ta makurkuranganda iti bala ken paltog, kadagiti ramit a pakigubat iti baet ti kaadda dagiti maikurkurimed a pondo a mangpapuskol laeng iti bulsa dagiti nangangato nga opisial.#