Footer

Luglugan ti munisipio, naibilin a maigarahe iti motor pool

CABUGAO, Ilocos Sur – Kas paset ti gannuatna a mangsalaknib kadagiti luglugan ti munisipio iti pannakaabuso ti pannakaaramatda, imbilin ti mayor ditoy a maikabil amin a luglugan iti motorpool ti munisipio.

Kinuna ni Mayor Mayor Edgardo “Ediboi” Cobangbang, Jr. a ti pannakaigarahe amin a luglugan ti munisipio ti makitana a nangnangruna a solusion tapno maprotektaran dagitoy iti pannakaabuso ti pannakaaramatda ken para iti pannakamentenerda.

“Ti pannakapaadda iti motorpool ti makitak a nangnangruna a solusion para kadagiti nasangpetak a problema mainaig kadagiti impatawidda (sinukatanna nga administrasion) a luglugan a nakurang ti pannakamentenerda ken naab-abuso ti pannakausarda,” kinuna ni Cobangbang.

Kinuna ti mayor a napaadda ti nasao a motorpool a masarakan iti likudan a paset ti slaughterhouse iti Barangay Baclig babaen ti tulong ti sangguniang bayan tapno ditoy ti pakaigarahean ken pakaaywanan amin a lugan ti munisipio.

Innayon ti mayor nga iti pannakaigarahe amin a lugan iti motorpool, malapdan ti pannakaaramatda para iti personal a lakad dagiti empleado ditoy nga ili.

“…Kuarta dagiti tattao ti us-usarentayo iti pannakamentener kadagitoy a luglugan ket masapul nga annadantayo dagitoy a paggastuan ti ili ti Cabugao,” kinuna ti mayor.

Iti immun-una nga interbiona iti radio, naipalgak ni Cobangbang ti kaadda dagiti lugan ken equipment a ginatang ti munisipio a nasangpetanna a malaksid a “sobrasobra ti pategda” ngem puro dadaelda pay.

Maipalagip nga apaman a nakatugaw ni Cobangbang, nangiyalokar iti pundo manipud iti bingay ti munisipio iti RA 7171 a  pinanggatang iti maysa a baro a buldoser ken maysa a grader a kasapulan a pangpasimpa kadagiti kalsada ditoy nga ili.

Iti dayta met nga la interbio, impalgak pay ti mayor nga adda iggemna a report manipud iti Commission on Audit nga adda dagiti proyekto ti kalsada a kurang ti kaakabada ken kaatiddogda.

Napaayaban dagiti kontraktor dagitoy a proyekto tapno simpaenda ti trinabahoda.#

Comments are closed.