Footer

SALAYSAY: Kannawidan Ylocos Festival: Uppat a tawenen a mangitantandudo kadagiti kultura ken tradision ti Ilocos Sur

Dinto agsardeng ti gobierno probinsial ti Ilocos Sur a mangparangen iti nabaknang a kultura ken tradision ti Ilocos Sur. Kas kuna dagiti mangtimtimon iti probinsia a da Gob. Luis “Chavit” Singson ken Bise Gob. Deogracias Victor “DV” Savellano, nasken ti agtultuloy a pannakaipabuya dagiti kadaanan a salsala, maipangngeg dagiti kadaanan nga ayug ken samiweng ken maikkan importansia dagiti napipintas nga ugali ken kannawidan dagiti Ilokano agsipud ta babaen ti kastoy a wagas, maipasagepsep kadagiti naub-ubing a henerasion ni Ilokano ti kinapateg dagitoy a kultura ken tradision. Gapu ta maiyallatiw dagitoy kadagiti ubbing, saan ngarud a maitanem iti lipat dagitoy napateg a tawid ti puli ni Ilokano. Malaksid iti dayta, makaengganio pay ti probinsia iti adu a turista nga umay bumisita ken makipagpaset iti parambak ti probinsia. Agbalin ngarud daytoy a gundaway tapno maipakaammo saan laeng dagiti tradision no di pay dagiti agduduma a partuat ken produkto ti Ilocos Sur. Malaksid iti kultural nga aspeto, mainayon metten a mapasantak ti aspeto ti turismo ken agduduma nga industria ditoy.

Iti maikapaten a tawen sipud nainaw ti parambak, insayangkat manen ti Ilocos Sur ti Kannawidan Ylocos Festival manipud Enero 31 agingga iti Pebrero 6, 2011.

Naipakita ti kinarelihioso dagiti Ilokano kas ipaneknek ti pannakailukat ti parambak idi malem ti Enero 31 babaen ti maysa a misa konselebrada a naangay iti St. Paul Metropolitan Cathedral iti siudad ti Vigan. Indauluan ni Rev. Fr. Roque Reyes dagiti padi ti Nueva Segovia a nangannong iti misa.

Iti panagsermonna, kinuna ni Fr. Reyes a rumbeng  a pagyamanan ti Namarsua saan laeng a gapu iti rang-ay nga intedna iti Ilocos Sur no di pay iti kinabaknang ti kulturana a pakairamanan ditan ti kinadekket dagiti pampamilia.

Kalpasan ti misa, nailibut ti uppat a pulo a rebulto dagiti santo ken santa a patron dagiti parokia ken dagiti lamina ni Sta. Maria ken Apo Jesus. Naglikus daytoy iti aglawlaw ti siudad ti Vigan a simmurotan ti adu a tao.

Kas pagyaman iti adu a nakipagpaset, napakan amin a nakilibut iti maysa a boodle fight iti Plaza Salcedo bayat ti panagtokar dagiti banda a nangliwliwa kadagiti tattao bayat ti pannanganda.

Iti maikadua nga aldaw, naaramid ti panglukat a ritual nga inannong dagiti estudiante a kameng ti agduduma a tribu. Da Vice Gov. DV Savellano ken Ilocos Sur Schools Division Superintendent Marino Baytec ti nangisayangkat iti panagiwaris iti bagas, maysa a nakainsigudan nga aramid no adda parambak.

Naisaruno met a dagus ti pannakailukat ti Partuat ken Patanor Trade and Agri Fair a nakaipakitaan kadagiti agduduma a produkto ti probinsia manipud makan, mainum, dekorasion  ken masapsapul iti balay, mulmula ken masetas, kasta metten dagiti produkto a naggapu iti sabsabali a probinsia iti Northern Luzon ken Cordillera.  Kadua ni Vice Gov. Savellano da Director Cipriano Santiago ti Department of Agriculture, Director Leonardo Reynoso ti Department of Social Welfare and Development ken Director Martin Valera ti Department of Tourism.

Segun  ken ni Provincial Manager Grace Lapastura  ti Department of Trade and Industry, immadu dagiti nakipagpaset iti Partuat ken Patanor no ikumpara itay napan a tawen. Mapan a siam a pulo ti immay idi 2010 idinto nga umabot iti 140 exhibitors ti immay itoy a tawen. Mangipakita daytoy a lumatlataken ti Kannawidan Festival ken sigurado a dakkel ti mapastrek apaman a malpas ti innem nga aldaw ti trade fair.

(Adda tuloyna)

Comments are closed.