Footer

SARITA: SUBANG

NABARA ti subangmi idi rabii ken ni Dennis, ti inunaan iti tallo nga anakko.  Ti kaawan ti pagsapulanna ken naipundarda nga agassawa ti gapuna. Makikabkabbalayda pay laeng kadakami iti balaymi ditoy Paras uray iti baet nga addan asawana ken duan ti putotna, da Angelo ken Christine.  Gatas, diaper, agas, para pammigat, pangaldaw ken pangrabii— nakadepende pay laeng kadakami.

Sakbay a nagpinnalatipat ti nabara a balikasmi, nagsasangokami pay kada Arsing ken Eddie a kaarrubak iti minalem a bisiomi.  Dimi ngaminen maliwayan ti minalem a sesionmi iti lamisaan a ti agendami ket sammigel.

Sigud a saan a sumungsungbat ni Dennis no kastoy a sumro ti kinatarabitabko nangruna no nabartekakon.  Diak met ngarud maigawid ti dilak iti kayatko nga ibaga.  Tarabitab a mammartek,  kas kuna ngarud ni Jelly nga asawak.

No agrikiarkami, ti kaawan latta iti trabahona ti derderrek.  Adda pammasagid iti tunggal balikasko … nga ammok nga umukuok iti riknana.  No dadduma, ammok a nagubsang ti maisawangko.   Ngem no marugiak, narasawen ti dilak kadagiti ibalbalikasko.  No kasdiay a sumro ti ungetko:  “Palamlamutkayo lattan!”  makunak pay.

Adda metten asawa ti dua nga adi ni Dennis,  ni Edith, ti kakaisuna a babai ken ni Bong a kimmut. Agdadagsen met ti asawa ni Bong.

Nasingpet met ketdi ni Dennis.  Bayat nga agbirbirok pay laeng iti trabahona ket nagaget nga agtrabaho iti balay.  Tultulonganna ni Sally nga asawana.  Kas pammaneknek, nadalimanek ti balay.  No sumangpetak iti malem, nakalutodan.  Mangan laengen ti kuaenmi ken baket a naggapu met iti naglakuanna.

No adda pagpletena ket agturong idiay ili tapno agbirok iti trabaho.  Suknadanna dagiti impasana nga application letter.  Nakaipasa payen iti resumena idiay city hall.  Urayenna kano laengen ti ayabda.

Diak met gagara a pasaktan ni Dennis ta makitak met ti pingetna nga agbirok iti trabaho.  Ngem no dadduma, diak maaluadan ti siudotko nangruna no makitak a nakailad wenno mabaybay-anna ti putotna a nakadungdungrit a masangpetak manipud iti shop.  Ket no nakainomakon, diakon maigawid ti dilak.

No adda pakaay-aywak iti panaggianda ditoy balay, isuda da Angelo ken Christine.  Ni Angelo, nakaay-ayat ti kinagarawigawna iti tawenna a dua.  Numona ta nagdungngo kaniak.  Adda laeng bengbengegna nangruna no saan a matungpal ti kayatna.  Mapampanuynoyan ngamin.

Ngem kunada, maymayat ti ubing a naalikuteg ngem iti natalna.  No sumangpetak iti malem manipud iti machine shop a panggedak, adda latta pasarabok a siopaw wenno banana cue.  Sumabet lattan kaniak uray nakaas-aseteak.  No lemmengak wenno liklikak.  Ayna, agdalupisak ket irungaabnan.  Iti rabii, kaid-iddami ken ni baket.  Liwliwamin ti pannakigantil kenkuana agingga a mabannog sakbay a maturog.

Iti maysa a malem, nasangpetak ni Angelo nga agsangsangit, nakaduldulpet a nakailad iti daga.  ‘Yabak koma ni Sally a manugangko ngem nangegko met ti panagsangit ti maladaga nga ubbana a ni Christine… innem a bulanna.

“Apay nga agsangsangitka, balong?”  intimekko.

Apaman a nangegna ti bosesko, insigida a bimmangon ket inarakupnak.  Kunam la no kanayon a mail-iliwan.

“Dede… dede…”  inlailona kaniak.

Maawatak a mabisin, kayatna ti agpatimpla iti gatasna.  Pinunasko ti pingpingna babaen iti gayadan ti badok.  Inubbak ket tinurongmi ti kusina.  Nangalaak iti maysa a naugasan a tsupon, pinakbuak iti napudot a danum manipud iti termos.  Inalak ti Lactumna, nangkaudak iti namitlo a daras.  Kinulog-kulogko ket nagpusisit gapu iti bara ti danum.

“Ipalamiista pay, wen?”  kinunak.

Ibabak koman ta innak gumatang ti sigarilio ngem dina kayat ti paidisso.  Immirut ketdi ti arakupna.  Kapilitan nga inkuyogkon iti tiendaan ni Tessie.

“Gumatangak man iti vitaminsko, Tessie,”  intimekko.

“Liquid wenno kapsula,” insaludsodna.  Ti liquid a kunana ket arak idinto a sigarilio met ti kapsula.

“Kapsula, kaguddua’t kaha,”  diakon imbaga ti brandko ta ammonan.  Inyawatko ti singkuenta pisos.

Bayat a kuenkuentaen ni Tessie ti suplik, indagsen ni Angelo ti bagina tapno makaasideg iti tawa a nakabitinan dagiti chitchitria.  Idi kuan, nagitudon kadagiti kayatna a kanen.

“Yam— yam!”  intudona ti kendi.

“Ayna, balong… madadael ti ngipenmo.”

“Endi, yam! yam!”  impapilitna.  Nagkuribibin.

Ania pay ngarud ti mabalinak.  “Mangtedka man, Tessie.”  inkissiimko.

“Narigat ti agapo, ania, manong?”  inyisem ni Tessie bayat a mangkakaut iti kendi.

“Wen ngarud.  Palalo pay ti kinabengegna,”  insungbatko.

“Paboritonaka ngamin ni Amang, ania, Angelo?”  kinitana ti ubing.

“Ay wen, dina pay kayat a taliawen ti amana no addaak.  Bautenda met,”  insungbatko.

Insigida nga impalukat ni Angelo ti maysa a kendi apaman a naiggamanna.  Idi makadanonkami idiay balay, ibabak koman ta maktangannak metten ngem madina.  Daytoy ti rigatna iti ubing a nairuam ken ni apona.  Adda met apok ken ni Edith. Adda pay ni Christine a simmaruno kenkuana ngem diak la mailawlawag ti kinadekketko kenkuana.  Mabalin a ti maysa a rason ta isuna ti inunaan ngamin.  Manipud idi naipasngay, addaakon iti sibayna.  Diak ngata kabaelan no maipanaw kaniak daytoy nga apok.

Umanay la a pang-blackmail  kaniak daytoy ni Dennis no agsubangkami.  No ibagana nga umallatiwdan idiay San Esteban, diakon makatagari.

Ngem no maawatannak la koma ni Dennis.  No apay a kanayon a pasagidak isuna.  Mariribukannak met iti agdama a kasasaadna.  Kayatko a madagdag a maaddaan iti trabaho a pagsanggiran ti pamiliana.  No adda man maibagak a nakarkaro, bunga ngata daytoy iti kinabartekko.  Ngem no ammona la koma, nga uray siak met masaktanak met iti ibagbagak kenkuana.

(Adda tuloyna)

Comments are closed.