Footer

Tabako, di naapektaran iti nagsaruno a panagtudona

CANDON CITY – Saan a nagdaksan no di ket nabenepisiaran dagiti mannalon a nagmula iti tabako ti panagtudona itay nabiit, segun iti maysa nga opisial ti National Tobacco Administration.

Kinuna ni Estella de Peralta, branch manager ti NTA a nakabase ditoy siudad, a saan a naapektaran dagiti tabako a mula iti panagtudona iti umuna a lawas ti Pebrero agsipud ta malaksid a saan a napigsa, apagbiit laeng ti panagbayakabakna.

“Beneficial pay laeng (panagtudona),” kinuna ni de Peralta, sana innayon a saan a maapektaran dagiti mula a tabako no “dina la ketdi diretsuen ken ibayag.”

Kinuna ni Mendoza a nupay adda dagiti naawatna a report a nagdandanag dagiti mannalon gapu iti panagtudona kadagiti napalabas a tartaraudi a lawas ti Enero ken umuna a lawas ti Pebrero, awan met ti dimmanon iti opisinada a nadadael a mula a tabako.

Kagura ti tabako ti agpaut a napigsa a tudo agsipud ta no naglayas ti talon, aglungsot dagiti mula a tabako nga agtungpal iti panaglaylay ken pannakatayda.

Kadagiti napalabas a tawen, ti nasapa a panagtutudona a nakagapu ti panaglaylay dagiti mulada a tabako ti nakagapu iti panagpukaw dagiti mannalon ken nakaupayanda a nagmula.

Iti daytoy a bulan, kapadesen ti panaggatud kadagiti pakpakauna a bulong ti tabako tapno matudok ken maipugonda.

Ngem nupay addan dagiti nagatud a bulong, saan pay a nangrugi ti panaggatangan agsipud ta ur-urayen pay laeng dagiti traders ti pormal a panaglukat ti tobacco trading season.

Nupay kasta, mangnamnama dagiti mannalon a nasayaat ti presio ti tabako iti daytoy a tobacco season. Idi napan a tawen, immabut iti nasurok nga P70 kada kilo ti presio ti Grade A a tabako.#