Footer

TARAON TI PANUNOT: Ni Victor iti sanguanan ti sulisog (Maudi a paset)

Kinasarita ni Delia ni Victor.

“Saanmo a tungpalen dayta nga ibagbaga ni Mr. Ang, Victor.  Napatpateg ti nadalus a nagan ngem ti kinabaknang. Saan a mailimed ti tao ti aniaman nga aramidna iti Namarsua.”

“Ania ti kayatmo a sawen? Ilawlawagmo man.”

“Ti kayatko a sawen, no matakuatanda a pinaburam ni Mr. Ang, di pay ket ibagadan a maysaka a suitik? A gapu laeng iti dakkel a gatad ket inlakom ti kinataom? Saan a maiparbeng dayta, Victor, saan kadi? Maapektaran ti pamiliam – lalona dagiti annakmo. Saanko kayat a maaramid dayta, Victor.”

“Mapampanunotko met dayta, Delia. Ngem mariribukannak.”

“Apay a dimo saraken ni Fr. Aris? Di met agkagayyemankayo? Agpaballakadka kenkuana, lakay!”

Sinarak ni Victor ni Fr. Aris iti parokia ni St. James.

“Dagiti balikas ti Dios ti mangited kenka iti silaw ti biag, Victor. Dayta ti manglawlawag iti panunotmo. Masapul ngarud a dumngegka a nalaing.”

“Ania kadi dayta, father, sawem koma.”

“Adu dagiti binatog iti Nasantuan a Biblia a makaited kenka iti silaw ti biag iti kanito a maburiboranka. Dagiti silaw a manglawag iti panunotmo, lalo kadagiti iyetnagmo a pangngeddeng.”

“Masulsulisogak ngaruden, Fr. Aris. Diak ammo ti aramidek. Idalannak koma. Sawem koma dagiti makasilaw iti panunotko. Sawem koma ti pakalawlawagak.”

“Agurayka ta ibasak kenka. Manipud iti Libro dagiti Salmo 1:1, kunana: Nagasat ti tao a di mangipangag iti pammagbaga dagiti managdakdakes, a di mangtulad iti aramid dagiti managbasol ken di makikappon kadagiti mangrabrabak iti Dios… dayta… dayta koma ti pagpanunotam, Victor.”

“Fr. Aris, ania kadi ti kayatna a sawen?”

“Nagasatka kano no dimo ipangag dagiti managbasol. Managbasol daydiay a Mr. Ang. Sulsulisogennaka. Isungsongnaka iti sinisuitik nga aramid. Kayatmo kadi?”

“S-saan a, Father…”

“Iti kanito a masulisogka, wenno adda mangsulsulisog kenka, kastoy ti ikararagmo, manipud iti Salmo 139:23-24: Usigennak, O, Dios, ket ammuem ti adda iti pusok. Suotennak tapno makitam ti adda iti panunotko. Wen, sukimatennak no adda kinaulbod kaniak, ket iturongnak iti dalan nga agnanayon…”

“Dayta kadi ti aramidek, Father? Isu kadi?”

“Wen, ket kuna pay ti Ebanghelio ni San Mateo 26:41: Agpuot ken agkararagkayo tapno saankayo a matnag iti sulisog. Sisasagana ti espiritu ngem nakapuy ti lasag. Mabasa pay iti Surat ni San Pablo kadagiti Taga Corinto, 10:12-13: Siasinoman a mangipagarup a natalged ti panagtakderna, agannad koma amangan no matuang. Tunggal sulisog nga umay kadakayo, gagangay a dumteng iti tao.  Ngem tungpalen ti Dios ti karina, ket dina ipalubos a masulisogkayo iti diyo kabaelan a sarangten. No masulisogkayo, ikkannakayo iti pigsa a mangibtur ket iti kasta makalisikayo…”

“Agyamanak, Father, ta linawlawagam ti panunotko.”

“Ket manipud met iti Surat ni San Pablo kadagiti taga Filipos 4:8: Kamaudiananna, kakabsatko, agpanunotkayo kadagiti banag a naimbag ken maikari a raemen: dagiti napudno, natakneng, nalinteg, nadalus, napintas, ken nadayaw.”

Iti sumuno nga iseserrek ni Victor, nagsaritada manen ken ni Mr. Ang.

“Desididokayo a mangted iti maysa a milion, Mr. Ang?”

“Wen, itedko ita met laeng.”

“No kasano ti gagaryo a maited kadakayo ti proyekto, kasta met ti pangngeddengko, Mr. Ang. Ladingitek no paayenka.”

“Dimo kayat ti maysa a milion?”

“Goodbye, Mr. Ang…!” ket imbaban ni Victor ti telepono.

Sulisog. Masulsulisogka kadi a kas ti pannakasulisog ni Victor? Masulsulisogka iti aniaman a kita ti material a banag? Dagitoy ti basaem iti Nasantuan a Biblia: Salmo 1:1; Salmo:139:23-24; Mateo 26:41; Umuna a Corinto 10:12-14 ken ti Filipos 4:8. Ulit-ulitem a basaen ket imudingam ti dana a surotem iti biag. Siguradoak a maiwanwanka!#

Comments are closed.