Footer

Umuna a biahe ti SEAIR iti Vigan: Pebrero 25

VIGAN CITY – Impakaammo dagiti opisial ti South East Asian Airlines (SEAIR) ti pinal a panangrugi ti operasionda ditoy Vigan bayat ti naangay a consultation dialogue kadagiti amin nga stakeholders ti turismo ken LGUs iti kapitolio ti Ilocos Sur idi Pebrero 15, 2011.

Segun ken ni Joel Mendoza, route developer ti SEAIR, sumanglad ti umuna a flight ti eroplanoda iti Vigan airport  inton Pebrero 25, biernes, iti alas dos ti malem idinto nga agsubli met daytoy iti Manila iti oras ti 3:30 iti malem iti isu met laeng nga aldaw. Tunggal Domingo, agsanglad ti SEAIR iti Vigan iti alas 3:30 ti malem ken agsubli daytoy iti Manila iti 4:30 ti malem.

Innayon pay ni Mendoza a P2,500 ti agbalin a fix rate ti one way ticket, saan a kas iti nakairuaman a nalaklaka no agpareserba a nasapsapa ken nanginngina no agbiahe a dagus ti agpa-book. Sangapulo a kilo met ti kadagsen ti bagahe a bitbit ti maysa a pasahero.

“Nupay umabot laeng a nasurok a sangaribu ti bayad no agpa-book makabulan sakbay ti panagbiahe, mapan met a P3,500 no makalawas ken mapan a P5,000 ti bayad no nakurkurang ngem 48 nga oras ti panagpa-book sakbay nga agbiahe. Kayatmi a transparent ti aktual a bayad ken impatang ni Gov. Luis “Chavit” Singson a masapul a kabaelan ti kaaduan ti plete iti eroplano isu a fix rate ti namay-anmi,’ inlawlawag ni Mendoza.

Kadagiti agpailibro iti flight, adda iti Vigan Plaza Hotel ti authorized ticketing office ti SEAIR idinto a masarakan iti ruar ti Terminal 1 ken iti Arnaiz cor. Makati Avenue iti Makati City dagiti opisinada iti Metro Manila. Para met iti online booking aglog-on iti www.flyseair.com.

Nakatutok ti SEAIR iti leisure market wenno ti panangitandudo iti kinapintas ti lugar tapno makaguyugoy iti agbiahe nupay awatenda met ti amin a klase ti pasahero kas dagiti government employees, negosiante ken dadduma pay.

“Kitkitaenmi ti posibilidad ti Vigan nga agpalin a maikalima a tourist destination iti pagilian sumaruno iti Boracay, Palawan, Dakak ken Siargao,” impalgak pay ti route developer.

Kinuna ni Mendoza a kangrunaan a pangawis ti Vigan ti panagbalin daytoy a UNESCO Heritage City nga addaan iti nabaknang ken naidumduma a kultura, addaan iti well preserved a tradision ken natural a kinapintas a sigurado a magustuan dagiti cultural tourists ken dagiti nature (eco-tourism ken adventure) tourists.

Kinuna met ni Vice Gov. Deogracias Victor “DV” Savellano  a gapu iti dakkel a potensial ti Ilocos Sur iti turismo masapul a maaddaanen ti probinsia iti agresibo a programa iti turismo ket iti kaadda ti rota ti eroplano ditoy a nadardaras a danonen dagiti turista ti maysa kadagiti wagas tapno maitandudo ken maiyam-ammo dagiti lugar nga ipagpannakkel ti probinsia.

Karaman kadagiti dimmar-ay iti nadakamat a konsultasion dagiti kameng ti hunta probinsial, liga dagiti mayor, liga dagiti bise mayor, dadaulo dagiti national line agencies, dagiti tourism officers ti probinsia ken agduduma nga LGUs, pannakabagi dagiti ahensia ti travel and tours, dagiti adda iti akademia ken kameng ti media.#

Comments are closed.