Footer

4 mannanakaw, naipiskot iti pursuit operation

SANTIAGO, Ilocos Sur – Uppat a lalaki ti tiniliw dagiti polis iti insayangkatda a pursuit operation kalpasan a tinakawan dagitoy ti maysa a pagtagilakuan iti Santa Maria, Ilocos Sur.

Addan iti kustodia ti polis ditoy dagiti suspek a da Gilves Balatero y Semilla, 29, naasawaan, residente iti Bolian, Cavite; Rey Genon y pelimer, 48, baro, residente iti Barangay San Agustin, Cavite; Michael Malic y Apao, 34, naasawaan, residente iti barangay Salawag, Dasma 3, Cavite; ken Federico Gallarin Gaoat, 40, naasawaan, taga-Barangay Caterman, Candon City.

Segun iti inisial nga inbestigasion, idi agarup 3:40 ti malem ti Pebrero 23, simrek ti grupo ti pito a tattao iti Holiday Mart a masarakan iti baro a tiendaan iti Barangay Maynganay, Sta. Maria, Ilocos Sur ket nagpammarangda a kustomer a gumatang iti groseria.

Kalpasan ti sumagmamano a minutos, rimmuar ti grupo ngem nagsuspetsa ti dua a para karga kadagiti nagatang a groseria ket kinamatda dagitoy ngem dagdagus a limmugan dagiti suspek iti Isuzu Crosswind sada nagpataray a nagpaabagatan.

Nagpaarayat dagiti trabahador iti polis ket kinamat dagitoy ti lugan dagiti suspek idinto a nagpatulongda kadagiti kaparangetda a police station.

Dagiti polis ti Santiago ti naka-intercept iti lugan ket inarestoda dagiti suspek.

Narekobre iti uneg ti lugan dagiti groseria nga impuslit dagiti suspek.#

Comments are closed.