Footer

BANNER NEWS: Chavit, di kontento pannakadepensa ti kaso ni Cong. Singson

VIGAN CITY – Saan a kontento ni Gov. Luis “Chavit” Singson iti pannakadepensa ti drug trafficking case ti anakna a ni Cong. Ronaldo Singson iti Hong Kong.

Iti interbio kenkuana ti Barangay Commando Brigada a naipatangatang iti DWRS idi Pebrero 24 kalpasan ti panangsentensia ti Hong Kong court a maibalud ti diputado iti makatawen ken innem a bulan, kinuna ni Singson a nakapatengngan ti hearing ti kaso ni Cong. Singson idi maammuanna a pinaamin dagiti abogado daytoy iti panagikut iti droga kas paset ti depensana tapno mapalag-anan ti dusana.

“Idi imbagada kaniak ket nakapatengngadan (kaso),” kinuna ni Singson idinto nga innayonna a no naammuanna koma a nasapa ti plano a depensa dagiti abogado ti anakna, pinasukatanna koma ida.

Kinuna ti gobernador a kinabuteng dagiti abogado ni Cong. Singson a maipataw kenkuana ti nadagdagsen a dusa a lima a tawen wenno nasursurok pay isu a pinaaminda iti panagikut iti droga.

“No kastoy koma ti imbagada idi damo, nagbirokkami koma iti sabali nga abogado,” kinuna ni Singson sana innayon a dati pay a prosecutor ti abogado ti anakna a “saan koma a rumbeng”.

Kinuna ti gobernador a dakkel a nakadadaelan ti anakna tignay dagiti “di makatutor” a kongresista a “mangkugtar” kenkuana iti Kamara.

Bayat ti pannakausig ti kaso, dinawat ti gobernador kadagiti agilinlinteg nga urayenda pay a malpas ti kaso ti anakna iti Hong Kong sada agtignay a mangkugtar kenkuana.

“No malpas ti kaso, mabalinda nga aramiden latta ti kayatda nga aramiden… libreda a mangkugtar (ken ni Cong. Singson),” kinuna pay ni Singson iti immun-una nga interbio kenkuana ni Jun Ramos a naipatangatang met laeng iti DWRS.

Kinuna ni Singson a “nalpasen ti kaso”, ket nagyaman kadagiti nangited iti suporta kadakuada agraman kadagiti saan a nakaawat ken nangidagdagadag iti pannakaikkat ni Cong. Singson.

Idi madamag no aglusulos ni Cong. Singson kalpasan ti pannakasentensiana, insungbat ni Singson a napanunot daytan ti anakna uray idi madama a madengdengngeg ti kasona ket ita ta nalpasen ti kaso, isunto ti mangiwaragawag iti desisionna.

Kinunana a no ag-resign ti anakna, maideklara ti vacancy iti umuna a distrito ti probinsia sa maangay ti special elections a pakapilian ti sumukat iti anakna.#