Footer

PDEA, naalarma umad-adu a kaso OFWs a naaramat a drug mules

SAN FERNANDO CITY – Segun iti nangato nga opisial ti Philippine Drug Enforcement Agency (PDEA), makaalarma ti umad-adu a bilang dagiti overseas Filipino workers a matiltiliw a kas drug mules dagiti sindikato ti droga.

Iti interbio ti Bombo Radyo La Union ken ni Senior Undersecretary Jose Gutierrez, Jr., Director General ti Philippine Drug Enforcement Agency (PDEA), indagadagna kadagiti overseas Filipino workers iti saanda a panagawat iti bagahe wenno paw-it aglalo no dida ammo dagiti linaonda amangan no dagitoy ket naglaonda iti maiparparit a droga.

Kanaig daytoy, kinuna ni Gutierrez a papigsaen ti ahensia nga idauluanna ti Task Force Drug Couriers tapno malapdan ti pannakabiktima dagiti Pilipino a mapan iti sabali a pagilian kadagiti sindikato ti droga.

Karaman ni Gutierrez  kadagiti kangrunaan a sangaili a nangimatang iti ceremonial burning dagiti mula a marihuana a pinag-ot dagiti operatiba a polis a pakairamanan ti PDEA iti lima nga aldaw nga operasion iti tri-boundary ti Ilocos Sur, La Union ken Benguet a naigiddan iti umuna a command visit ni PNP Chief Director General Raul M. Bacalzo ti police regional office 1 ditoy idi Pebrero 18.

Ni mismo a Bacalzo ti nangisab-it iti Medalya ng Kagalingan kadagiti miembro ti Regional Anti-Illegal Drugs Special Operations Task Group (RAIDSOTG) iti seremonia a naaramid iti Camp BGen Oscar M. Florendo idi Pebrero 18 gapu iti naballigi a panangrautda kadagiti plantasion ti marihuana iti nagbeddengan ti Ilocos Sur, La Union ken Benguet.

Iti lima nga aldaw nga operasion a napanaganan Oplan Farmville III,  pinag-ot dagiti operatiba ti aganay a 1.3 million dagiti fully grown a mula a marihuana ken aganay a 800,000 a seedlings, ken nakakumpiskada pay iti 18,000 grams a napagango a marijuana stalks, 800 grams a bukbukel ken 60 bricks a dried marijuana a mapattapatta nga agpateg amin iti P323 milion.

Kinuna ni Gutierrez nga adda dagiti mabiktima nga OFW a maaramat a kas drug mules agsipud ta nalakada nga agtaltalek, nangruna no kailianda ti agipaw-it iti bagahe a dida ammo a naglaon met gayam iti droga.

Naammuan manipud iti PDEA nga addan 689 a Filipino a natiliw gapu iti panagipuslitda iti illegal a droga nga impaw-it dagiti drug syndicates.

Aganay a 63 porsiento kadagitoy ti babbai idinto a 37 porsiento met dagiti lallaki.

Nakedngan a mabitay Ramon Credo, 42, ken Sally Villanueva, 32, idi Pebrero 21 idinto a Pebrero 22 ken ni Elizabeth Batain, 38 ngem naitantan kalpasan ti last minute nga apela iti klemensia ti gobierno ti Pilipinas babaen ken ni Vice Presidente Jejomar Binay.

Natiliw idi 2008 dagitoy nga OFW gapu iti nagsisina a panagipuslitda iti 4,000 agingga iti 6,800 a gramo ti heroin iti China ket nasentensiaanda a matay babaen iti lethal injection.

Mapapati a natangdanan dagiti tallo iti dakkel a kantidad tapno ipuslitda dagiti droga iti nasao a pagilian.#

Comments are closed.