Footer

SALAYSAY: Kannawidan Ylocos Festival: uppat a tawenen a mangitantandudo kadagiti kultura ken tradision ti Ilocos Sur (Tuloyna)

Maysa met a paset ti nakaipabuyaan dagiti datdatlag ti kadakkelna nga apit dagiti mannalon ken mangngalap. Adda dagiti atiddog a bunga ti paria, marunggay, kabatiti,  dadakkel  ken agkakadagsen a kamas, langka, kamatis, lasona, bawang, mais, repolio, cauliflower, tabungaw, kamoteng kahoy ken dadduma pay a produkto iti talon. Adda pay naiparang a dadakkel a lames kas iti tilapia, sea bass, apahap, rasa, igat ken hito.

Iti met amianan ti kapitolio a naidispley dagiti dadakkel ken nakakaskasdaaw nga animal kas iti nadadagsen a manok, dadakkel ken lima ti anakna a kalding, saan a gagangay ti kadakkelna a baka, nuang, karnero ken dadduma pay a taraken dagiti kaprobinsiaan. Amin dagitoy ket nairaman iti Salip dagiti Naisangsangayan ken Datdatlag. Naipaayan iti premio dagiti nangabak iti agduduma a kategoria a naiyawat iti maudi nga aldaw ti parambak.

Maysa met a photo exhibit a napauluan iti Punganay ti Kannawidan  ti naipabuya iti Palacio Arsobispado. Naangay daytoy babaen ti pannakitinnulong ti The Ilocandia Photographic Society. Ditoy a naipakita dagiti daan a ladladawan iti agduduma a paset ti Ilocos Sur ken dagiti obra dagiti potograpo a kameng ti TIPS.

Iti Plasa Salcedo, naisayangkat met ti choir, drum and lyre, ken street dancing competition a nangipakitaan dagiti ubbing nga agbasbasa iti elementaria iti laingda.

Naangay pay ti kontes iti kinnaaduan ti makan ken mainum iti kamalman ti maikadua nga aldaw ti parambak.

Naideklara nga ari ken reyna dagiti simmalip iti agduduma a kategoria a pakaibilangan da: Danilo Gaoiran ti Puro, Magsingal (kalamay eating contest); Ariel Valdez ti San Ildefonso (cornik eating contest);  Carol Mendoza ti Barangay III, Vigan City (bibingka eating contest); Roldan Perez ti Balaleng, Bantay (empanada eating contest); Pamela Brillantes ti Pantay Daya, Vigan City (tinubong eating contest); Aris Andres ti San Julian Sur, Vigan City (hopia eating contest); Paulina Mata ti San Julian Norte, Vigan City (suman eating contest); Pablo Bernal ti San Julian Norte, Vigan City (longganisa eating contest); Jose Baradi ti San Julian Norte, Vigan City (bagnet eating contest); Angela Regua ti Barangay III ken Teodoro Peralta ti San Julian Norte, Vigan City (basi drinking contest).

Nagpabuya ti Bayanihan Dance Company iti karabianna a nakaitampokan dagiti agduduma a folk dances ken nakaipangngegan dagiti samiweng ken uni dagiti indigenous instruments iti pagilian.

Impakita met dagiti duapulo ket lima a kandidata iti Saniata ti Ilocos Sur dagiti talentoda iti Talent Night. Napili kas Star of the Night ni Unique Fadul ti Cabugao gapu iti makapasagawisiw a panagsalana.

Naituloy dagiti pasalip iti maikatlo nga aldaw. Immuna a naiparang dagiti nakainsigudan a sala babaen kadagiti estudiante manipud iti upland municipalities kasta metten dagiti folk dances kas iti Binatbatan, Rogelia, Kundiman, Kalapati, Surtido Sur, Sinnublian, Baingles ken Dinnaklisan. Kalpasan ti pangaldaw a naangay ti pasalip iti contemporary dances.

Iti pannakiuman ken ni   Mr. Shan Tumacdang a nangtarawidwid iti dua nga aldaw a pasalip, kinunana a dagiti nangabak kadagiti pasalip ti mangirepresentar iti Ilocos Sur iti Regional Arts Festival sadiay Pangasinan inton Marso.

Nadiskobre dagiti agduduma a talento ni Ilokano iti talent search iti sardam. Adda nagsala, nagkanta, nagtokar iti instrumento ken adda pay nagsalamangka.

Iti maikapat nga aldaw, impakita met dagiti craftsmen ti laingda iti delphic games (on the spot craft demo ken most innovative products). Adda kurtina a naaramid iti plastik, kawayan ken dadduma pay nga aramid  manipud iti ima dagiti agparpartuat. Kasta metten a nailukat ti agmalmalem a chess competition para met kadagiti Ilokano a nalalaing itoy a mind game.

Imparang met dagiti upland municipalities dagiti agduduma a kadaanan a ritual kas iti kaykay-ab ti Banayoyo; wanes ti Lidlidda; Lablabbaan ti San Emilio; Tayuktok ti Gregorio del Pilar; palis, sagawsaw ken kam-an si wanes ti Suyo.

(Adda tuloyna)

Comments are closed.