Footer

SALAYSAY: Our Lady of Lourdes: Apparition ti Nailangitan nga Ina (Maikadua a paset)

Manipud Pebrero 2-10, tinawen a mapasamak ti siam nga aldaw a nobena ti sibubukel a Katoliko iti sangalubongan, ta iti Pebrero 11 ti piesta ti Our Lady of Lourdes. Insaganan amin a napeklan a Marian devotee ti bagina para itoy nga okasion. Saanna a maliwayan daytoy kas kadagiti dadduma pay a debosion.

Apparition iti Nainlangitan nga Ina ken ni Bernadette Soubirous idi Pebrero 11, 1858 ti Our Lady Lourdes.

Kadagiti naglabas a tawen, nupay adda latta met dagiti maang-angay a nobena kadagiti nadumaduma a parish iti Siudad ti Baguio, nakairuamanen dagiti umili ti mapan makinobena iti pribado a lugar a saan a kukua ti Diocese ti Baguio-Benguet, iti  sirok ti tarikayo a balay a yan ti bassit a kapilia iti sirokna. Iti ruar, iti bakras ti bantay ti yan ti grotto ti Our Lady of Lourdes ken ti babaenna a paraangan ti pakaangayan ti nobena a mangrugi iti alas-singko iti malem, santo sarunuen ti misa.

Nupay saan a maibilang a parish daytoy, saan a magawidan dagiti umili iti Baguio ti agturong ditoy no kastoy a Pebrero. Nagbassit ti kapilia. Nagbassit ti espasio ti lote. Aglilinnetlet dagiti tao. Agtatakder ken uray sadino ditan iti pangipuestuan ti bagi.

Ngem apay nga agdudupudop dagiti Marian devotee ditoy a lugar idinto a maangay met ti nobena kadagiti nadumaduma a simbaan Katoliko?

Kastoy ti kapuonanna. Idi tartaraudi ti tawen 1930s, nagpaaramid daydi Doña Aurora Aragon Quezon iti bassit a grotto ti Our Lady of Lourdes iti Quezon compound iti rukib iti tikap ti bakras ti bantay iti igid ti maysa kadagiti kangrunaan a kalsada ti siudad, ti Kisad Road. Ni Doña Aurora ti kaingungot daydi Presidente Manuel L. Quezon. Napeklan ngamin a Marian devotee daydi Doña Aurora, isu a naawagan ti “the real Catholic Filipina” ken “the Mother of the Masses” gapu iti ayatna kadagiti umili. Idi nalpas ti grotto idi Disiembre 8, 1939, inrugin dagiti umili ti nagnobena ditoy.

Uray idi panawen ti Maikadua a Gubat Sangalubongan, nakakaskasdaaw ta saan a nagbuteng dagiti umili ti Baguio a nangaramid latta iti tinawen a nobena iti Nasantuan nga Ina ken panangselebrar iti Fiesta ti Our Lady of Lourdes iti Pebrero 11 – nga isu metten ti piesta ti barangay a makinsakup itoy, ti Burnham-Legarda Barangay.

Arig napatad ti siudad iti carpet bombing idi Marso 15, 1945 a kapades ti gubat, ngem saan man laeng a nagurlisan ti grotto idinto ta adda laeng daytoy iti tikap ti bantay iti abagatanen ti Burnham Park. Lalo la ket ngarud a timmibker ti pammati dagiti Marian devotee. Immadu dagiti deboto nga agturong ditoy a lugar nga agnobena. Saan a mailawlawag no apay.

Tawen, 1966 idi pormal nga inorganisa ni Fr. Jean-Marie Tchang, CICM, dagiti deboto a kas maysa a komunidad. Inaramatda a kapilia ti sirok ti tarikayo a balay dagiti ag-Quezon. Nangituding ti padi iti maysa nga aldaw para iti maysa a parish church ken dagiti komunidad a sakopen daytoy a mangidaulo iti nobena ken misa. Iti fiesta, a fiesta met ti barangay, ti met obisbo ti diocese ti Baguio-Benguet ti mangannong ti misa.

Idi laeng Setiembre 8, 2003 a naideklara a kas geographical parish iti siudad babaen ti agdama a bishop, Carlito Censon. Ti nalatak a kolumnista kadagiti nadumaduma a pagiwarnak iti siudad, ni Fr. Jose C. Alipio wenno ad-adda a maawagan iti Father “J” ti agdama idi a parish priest.

Bassit laeng ti malaonna iti uneg ti kapilia isu nga iti ruar ti yan dagiti kaadduan a makimisa. Adda naikabil a parachute a linong ken tugtugaw.

No agtudo, agpayongen dagiti makimisa. Adda pay dagidi panawen a mapayongan met ti padi a mangmisa. Mabbasa no mabbasa. Adda panawen nga agbagbagyo, agbayakabak, ngem saan a sawiren iti pannakabasa. Saan a sawiren ti lam-ek uray kasla kayab ti agbagbagyo ti angin. Adda ti linong a parachute, ngem no agangin nakarkaro a lam-ek ti ikayabna.

(Adda tuloyna)

Comments are closed.