Footer

Sentensia ti HK court ken ni Singson: 1 tawen ken 6 a bulan

HONG KONG – Makatawen ken innem a bulan a pannakabalud ti insentensia ti korte ditoy iti agilinlinteg ti Ilocos Sur gapu iti panagikutna iti maiparparit a droga.

Maibatay iti sentensia, maibalud ni Congressman Ronald Singson iti maysa a tawen ken uppat a bulan gapu iti panagikutna iti cocaine ken nanayonan iti dua a bulan gapu iti pannakasamsam pay kenkuana ti dua a tableta ti Nitrazepam wenno Valium.

Karaman a timmabuno iti pannakaiyetnag ti pangngeddeng ti korte ti pamilia ti diputado a pakaibilangan ni Gov. Luis “Chavit” Singson, ti inana a ni Evelyn, ti kabsatna a  Vigan City Vice Mayor Ryan Luis Singson ken ti nobiana a ni Lovi Poe.

Limmag-an ti sentensia ni Singson kalpasan a namati ti hues iti palawagna a saan a para lako ti nasamsam a droga iti ikutna no di ket para iti personal a panangaramatna.

Istrikto ti Hong Kong iti pannakaipakat ti lintegna maikontra iti droga. Iti babaen ti linteg daytoy a pagilian, maibilang a trafficking ti panangiserrek iti droga iti teritoriana, para man iti personal a pannakaaramat wenno para lako wenno maiwaras.

Maysa nga aldaw sakbay ti sentensia, namati ni District Court Judge Joseph Yau iti palawag ni Singson a saan a para lako ti droga a nasamsam iti ikutna no di ket para iti personal a panangaramatna.

Kinuna ni Yau a dina patien nga aglako ni Singson iti droga agsipud ta adda mabalinna gapu kadagiti nadumaduma a negosiona, kasta met nga awan ti gagayyem daytoy iti Hong Kong wenno iti Macau a pangibingayanna iti droga a nasamsam iti ikutna.

Nupay kasta, iti biang ti hues, eksaherado ti kaadu ti imbaga ti diputado a mausarna a droga tapno laeng ma-justify ti claim daytoy.

Iti panagpalawag ni Singson iti korte, kinunana nga on and off nga agar-aramat iti droga sipud pay idi 2004 ket makasinglot iti manipud iti uppat agingga iti lima a gramo iti maysa nga aldaw.

Uray ni Ilocos Sur Gov. Luis “Chavit” Singson imbatadna a kapilitan nga inannugot ti anakna a diputado nga isu ti agikut iti droga agsipud ta nasukalan dagiti otoridad kenkuana ngem inyunay-unayna a ti nakumpiska iti diputado ket para iti personal a kasapulanna, saan a tapno ilakona.

Agturong ni Singson iti Macau idi naaresto iti Chek Lap Kok International Airport ti Hong Kong idi Hulio 17, 2010 kalpasan a nasukalan iti ikutna ti cocaine nga agdagsen iti 26.1 grams ken dua a tableta ti Valium.

Nupay kasta, nagbalin laengen a 6.67 grams ti cocaine  kalpasan a saan a nairaman ti botelia a nakaikabilanna ket temporario a nawayawayaan ti diputado kalpasan ti panagpiansana iti HK$1 million babaen ti tulong ti dua a gagayyemna iti Hong Kong.#

Comments are closed.