Footer

TARAON TI PANUNOT: Ti Religious Formalism (Umuna a paset)

Kunada man, karirigatan a pagbalbaliwen ti agkunkuna a nagbalbaliwen. Pudno la unay dayta. Kaiyariganna tay tao a gunggonem payen a riingen ngem di makariing agsipud ta agintuturog. Kasanom koma a riingen ti nakariingen wenno agintuturog? Narigat nga aramiden dayta, he-he! Ikukotan ken ikumotanna pay uray no saan a  malammin!

Narigat a pagbalbaliwen dagiti mangibagbaga a saandan a kasapulan ti panagbalbaliw ta kaslaka nagawis iti pannangan kadagiti saanna a kayat ti sumango a mangan wenno mangibaga a kalkalpasna a nangan ngem ti kinaagpaysona, saanna laeng a magustuan ti inka yaw-awis a taraon.

Kastoy met laeng ti dua a grupo a mamati ken Apo Jesus. Adda makakita iti Lawag ket surotenna. Adda met mangibaga a mamati ken ni Jesus ngem kasungani ti agtaud iti bibigna, ubbaw ti linaon ti pusona.

Intay ngarud alaen a reperensia  ti Ebanghelio a kas insurat ni San Mateo 21: 28-32 maipapan iti pangngarig ti “Dua nga Annak.’ Pinauluantayo iti ‘Ti Religious Formalism’…

Iti maysa a malem, agsarsarita dagiti dua nga agtutubo, da Renan ken Darwin maipapan iti kapaliiwanda a madi a panangtratar ti kaarrubada nga adda  mabalinna iti biag iti manugangna.

“Nakakaasi met ni Manang Nena, Renan, saan nga ibibiang ni Nana Asiang a manugangna. Nagalasen, he-he…”

“Apay a maasianka? Ket no maysa met laeng kano idi a GRO ni Manang Nena kadagiti nadumaduma club iti siudad! Kasta met ti sayangguseng maipapan kenkuana.”

“Maasianak a ta tao met.  Maasiankanto pay iti piek, anianto la ketdin iti tao? Ken maysa, nagbalbaliw metten ni Manang Nena. Kasta met  ni Mang Nestor nga asawana a lokoloko idi, barumbado, drug addict ken school dropout.”

“Napaliiwko met ti naimpusuan a panagbalbaliwda. Isuna laeng ta saan a maawat ni Nana Asiang a dati a GRO kadagiti nadumaduma a club ti namanugangna wenno naasawa ni Mang Nestor nga anakna.”

“Mararaem ngamin iti gimong ti pamiliada. Relihiosoda ken mannakitinnulong.”

“Mannakitinnulongda a, ngem no tumulongda, nasken a maiwaragawag pay nga umuna iti radio, telebision, mabasa kadagiti pagiwarnak ken iti internet. Daytanto metten ti inda ipaspasindayag. Saanak man a komporme kadayta a banag. Saanak a bilib kadayta a klase ti itutulong.”

Bayat ti panagpatpatang da Darwin ken Renan, simmangpet ni Dolly a kataeb ken kaarrubada.

“Kasla napateg sa ti pagsarsaritaanyo a dua. Iramandak met a, aglalo no stomach progress, hi-hi…!” kinuna ti balasang.

“Ti man maipapan ken ni Manang Nena ti pagsarsaritaanmi ken Renan, Dolly. Agsipud ta saan a napintas ti napalabasna, ilidlidding ni Nana Asiang. Umno kadi dayta nga aramid wenno saan?”

Ngem agduadua ni Dolly iti isungbatna isu a napanunotda ken Darwin a saraken ti maysa pay a kaarrubada, ni Manang Celia, aktibo a kameng ti Singles for Christ. Saanen a simmurot ni Renan ta adda napateg nga aramidenna iti balayda.

“Rumbeng kadi nga ikkan iti importansia dagiti mayat nga agbalbaliw, Manang Celia?” ni Darwin ti nangiruangan iti saritaan.

“Apay a nadamagmo dayta, Darwin? Konektado kadi dayta iti gagarayo isu nga immaykayo ditoy balay?”

“Kastoy nay, Manang, napaliiwmi ken Dolly ti kasasaad ni Manang Nena, a kas manugang ni Nana Asiang. Pagaammomi la unay nga adda saan a nasayaat a pakasaritaanna iti napalabas ngem iti agdama ket naimpusuan met ti inna panagbalbaliw. Kasta met ken ni Manong Nestor nga asawana. Maikanatad kadi dayta nababa a panagkitkita ni Manang Nena kenkuana?”

(Adda tuloyna)

Comments are closed.