Footer

10 tattao, naaresto gapu iti panagsalungasing iti gun, liquor ban

SAN ESTEBAN, Ilocos Sur – Problema ti kapolisan ditoy ti pagturogan dagiti sangapulo a naaresto gapu iti panaglabsing iti paglintegan ti Commission on Elections gapu iti kinakipet ti pagbaludan iti police station.

Posible nga agtalinaed a problema ti hepe ti polis daytoy gapu ta kaadduan kadagiti naaresto ti saan a makapagpiansa para iti temporario a pannakawayawayada.

Naaresto idi Marso 1 da  Larry Escobar y Cabus, 28, naasawaan, mannalon; Thristan Jay Calinay Ulep, 23, baro; Jayson Cabus y Gorospe, 18, baro, estudiante;  Mark Cabus y Galindez, 18, baro, agpapada nga agnaed iti Barangay Baterya; ken Diony Bullos y Espinosa, 33, naasawaan, aglaklako, residente iti Barangay San Rafael, babaen ti bileg ti arrest warrant nga inyisio ni Judge Sixto Diompoc ti Regional Trial Court Branch 72, Narvacan, Ilocos Sur maigapu iti panaglabsingda iti Comelec Resolution No. 8730 wenno liquor ban.

Naaresto met gapu iti panagsalungasingda iti Comelec Resolution No. 8714 wenno gun ban ken liquor ban da Henry Cabus, Jr. y Udarbe, 27, naasawaan; Lito Cabus y Ordones, 35, baro, mannalon; Jimmy Cabus y Ordones, 46, mangngalap; Dave Soriano y Samonte, 18, baro, mangngalap, agpapada nga agnaed iti Barangay Baterya; ken Lester Ian Tagores y Bareng, 18, baro, residente iti Barangay Villa Quirino.

Naituding ti sag-P20,000 a piansa dagiti nakasuan iti panaglabsing iti liquor ban idinto a sag-P40,000 ti piansa dagiti naglabsing iti gun ken liquor ban.

Iti panagreport ni Konsehal Marvin Ong a naipatangatang iti DWRS, kinunana a sentimiento dagiti naaresto ken ti pamiliada nga adda met dagiti addaan iti nadagdagsen a kaso ngem isuda pay ti naaresto ken naipupok gapu laeng iti panaglabsingda iti liquor ban ken election ban.

Mapapati a di napakadaan dagiti naaresto ti pannakaiyisio ti warrant of arrest maikontra kaduada ta iti panangipagarupda, awanen ti kasoda gapu iti kinabayagnan a napasamak.

Naaresto dagiti sangapulo iti Barangay Apatot idi parbangon ti eleksion idi Mayo 2010 idi mapapati a nasukalan dagiti polis ti maysa a buneng ken maysa a botelia ti arak iti uneg ti maysa a traysikel a nagluganan ti komboy bayat ti panagrekoridada iti Barangay Apatot. Nairaman a naaresto dagiti lima pay a naglugan iti motorsiklo a pimmaraipus iti konboy bayat ti panagrekoridada iti nadakamat a barangay.

Kinuna ni Ong a kagapgapu ti sumagmamano kadagiti naaresto iti slaughter house gapu ta panagparti ti pagsapulanda isu nga adda buneng iti uneg ti traysikel. Kasta met a saan pay a nalukatan ti maysa a botelia ti arak a nakita dagiti polis iti lugan ken saan a nakainom dagiti naaresto.

Innayon ti konsehal a no saan a makapagpiansa dagiti naaresto agingga iti Lunes (Marso 7), kapilitan nga iyawat ti hepe ti polis dagitoy iti provincial jail a pakaipupokanda gapu iti kinailet ti pagbaludan iti police station ditoy nga ili.

Kabayatanna, panggep dagiti naaresto ti agapela iti korte a makissayan ti piansada para iti temporario a pannakawayawayada.#

Comments are closed.