Footer

No nabartekka, dika agmaneho: PNP provincial director

BANTAY, Ilocos Sur – Imballakad ni Police Senior Supt. Eduardo Dopale, Jr., Ilocos Sur provincial director, ti saan a panagmaneho dagiti adda luganna no nakainom wenno nabartekda tapno maliklikan ti desgrasia.

Kinuna ni Dopale nga adu dagiti madesdesgrasia a motorista uray addada iti inpluensia ti arak, nagmanehoda latta.

Dinayaw pay ni Dopale ti panangipakat ti lokal a gobierno ti Tagudin ken Candon City iti no helmet no travel policy.

“Nasayaat daytoy tapno maprotektaran dagiti tattao nga agdaldaliasat iti national highway,” kinuna ti provincial director.

Kabayatanna, iti Vigan City, idurduron ni Vice Mayor Ryan Singson ti pannakaipasa ti ordinansa a masapul nga agaramat iti helmet dagiti motorista agraman ti makisakay kadakuada no sumrekda iti siudad.

Madama ti pannakatratar ti nasao nga ordinansa iti sangguniang panlungsod.#