Footer

SALAYSAY: Kannawidan Ylocos Festival: Uppat a Tawenen a Mangitantandudo kadagiti Kultura ken Tradision ti Ilocos Sur (Tuloyna)

Napadayawan dagiti nasisiglat a barangay ken ili iti malem ti Pebrero 3, bayat ti Salisal Iladawanna’t Gaget dagiti Lumugar Agsaknap ti Timpuyog wenno SIGLAT Awards.

Inyalat ti Siudad ti Candon ti kaaduan a bilang ti major ken minor awards iti SIGLAT Awards a nakapilianda a Kasiglatan iti CY 2010 kas impakaammo ti SIGLAT committee a buklen dagiti agduduma nga opisina iti kapitolio. Tallo a major awards ti innala ti siudad babaen ti panangiyalat ti Barangay Calaoa-an ti Best Performing Barangay, Barangay San Andres kas Best Agricultural Practices ken Safest and Most Peaceful Barangay idinto a siam a minor awards ti naawatda babaen ti Barangay Calaoa-an (Outstanding Sangguniang Barangay, Most Functional Barangay Disaster Risk Reduction and Management Council ken Most Functional Barangay Anti-Drug Abuse Council); Barangay Tamurong Segundo (Most Outstanding Sangguniang Kabataan ken Best in Sports and Physical Development Program);  Metro Paypayad Cooperative, Brgy. Paypayad (Outstanding Barangay Based Cooperative); Barangay Tablac (Best Managed Day Care Center); Barangay Palacapac (Best in Organic Farming Program Implementation); Barangay Bagani Campo (Outstanding Baangay Tanod).

Nagpuesto iti maikadua ti ili a Cabugao babaen ti lima a major awards babaen ti pannakapili ti Barangay Pug-os (Most Child Friendly Barangay ken Best Innovative Practice); Barangay Dardarat (Best in Coastal Management ken Best in Fish Production and Aquaculture Development); Barangay Bonifacio (Best in Nutrition Program Implementation), tallo a minor awards babaen ti Barangay Pug-os (Best in Intensive Gardening, Best in Gender and Development Program Implementation ken Best Barangay Herbary), ken maysa nga individual award babaen ken ni Macrina Saturno a napili kas Best Nutrition Scholar.

Nagun-od ti Sta. Cruz ti maikatlo a puesto babaen ti maysa a major award babaen ti Barangay Banay (Cleanest and Greenest Barangay) ken tallo a minor awards babaen ti Barangay Pidpid (Most Functional Botika ng Barangay); Barangay Gabur Norte (Best in Persons with Disability Program Implementation); Fish Searchers Sta. Cruz Association Inc., Barangay  Pilar (Outstanding Fishermen Association).

Maikapat a puesto ti ili a Gregorio del Pilar babaen ti maysa a major ken maysa a minor award babaen ti Barangay Concepcion (Best in Culture and Arts) ken Barangay Poblacion Norte (Best Barangay Tree Park).

Dagitoy met dagiti dadduma pay a barangay a napili nga umawat iti pammadayaw:

Nalasin, Sto. Domingo (Most Healthy Barangay); Pudoc, San Vicente (Best Managed Elementary School in the Barangay); Cabugao, Suyo (Best in Solid Waste Management); Suysuyan, Lidlidda (Outstanding Farmers Association); R.I.C., Balidlid, Salcedo (Best Performing  Non-Government Organization); Maynganay Norte, Sta. Maria (Best in Tourism Promotion); Magsaysay, Tagudin (Best in Elderly Program Implementation).

Inyalat met ni Hercula Diaz ti Outstanding Barangay Health Worker Award ken Anita T. Castillo ti Paras, Sto. Domingo kas Outstanding Barangay Day Care Worker.

Immawat iti P50,000 dagiti major awards, P30,000 para iti minor ken P10,000 kadagiti individual awards. Naited met ti P150,000 para iti ili a kasiglatan, P100,000; P75,000 ken P50,000 para kadagiti nagpuesto iti maikadua agingga iti maikapat a puesto kas panagsaganadda.

Nagsubli met iti kadaanan a panawen ti Ilocos Sur babaen ti maysa a costume party a naangay iti pagtaengan ni Fr. Jose Burgos. Pati dagiti kanta a maipatpatayab bayat ti pannangan dagiti nagkawes a don ken donia ket mangipalagip iti biag iti probinsia idi panawen ti kastila.

Iti nasapa a bigat ti Pebrero 4, naangay ti lumba ti nataengan. Ditoy nga impakita da lolo ken lola a nupay tartaraknen idan ti rayuma, kabaelanda pay laeng ti makilumba ken makipagpaset iti parambak. Nasurok limapulo a nataengan ti nagsasalip ket naikkan iti premio dagiti immuna a nakadanon iti finish line.

Naangay pay itoy nga aldaw ti salisal iti panagpinta ken panagdisenio, slogan making contest, kasta metten ti dangadang ken saririt a pakairamanan ditan ti quiz bee, on the spot Ilocano poem writing contest ken dadduma pay. Naiyawat ti premio dagitoy iti kamalmanna a pannakaangay ti  SIGLAT ESKWELA a nakapilian ti Alilem Elementary School kas Safest Elementary School; Pudoc Elementary School, San Vicente kas Best Managed School Canteen ken Las-ud Elementary School, Tagudin kas Best PTCA. Napadayawan pay itoy nga okasion dagiti Outstanding Boy Scouts ken Girl Scouts.

Dagiti met annak ti Ilocos Sur a nakaited iti pammadayaw ken nagballigi iti pilida a tay-ak ti narekorgnisar iti Fr. Jose Burgos Achievement Awards a naangay iti karabianna. Siam a mabigbig nga Ilocos Surian ti pinadayawan ti gobierno probinsial itoy kangatuan a pammadayaw a maipaay iti annak ti Ilocos Sur kas pangbigbigna iti panagballigi dagitoy.

Naiyawat ti tropeo kada Cirilo Lao (business); DPWH Secretary Rogelio Lazo Singson,  (Engineering and Construction); Atty. Emil Jurado (Journalism); Dr. Leocadio Sebastian (Agriculture and Research); Grace Urbien Salvatus (Academe); Gen. (ret.) Diomedio Villanueva  (Military Services); Clemencia Parde (Food Processing Industry); Mary Ann Armovit (Music) ken Department of Finance Cesar Purisima, (Public Accountancy).

Iti awarding ceremony, kinuna ni Vice Gov. Deogracias Victor “DV” Savellano a ti nadakamat nga award ti kangatuan a pammigbig nga ipaay ti gobierno probinsial kadagiti maipagpannakkel a taga-Ilocos Sur. Nupay kaaduanen kadagiti awardees ti agnaeden iti sabali a lugar, agsublida nga agsubli iti nakayanakanda a daga gapu iti daytoy a pammadayaw.

Daytoyen ti maikapat a tawen a marekognisar dagiti achievers a taga-Ilocos Sur sipud naipasa iti sangguniang panlalawigan ti resolusion a mangpadayaw kadagiti illustrious sons and daughters ti probinsia tunggal Kannawidan Ylocos Festival.

Saan met a naawan ti panagpabuya dagiti opisial kas siguden a maar-aramid iti tinawen. Tinapatan da Vice Gov. Savellano, dagiti bokal ken dadduma pay nga opisial dagiti agbuybuya babaen ti kankanta. Mangipakita a saanda laeng a nalaing nga agpanday linteg no di pay ammoda met ti mangray-aw kadagiti tattao nga iturayanda.

Naisaruno ditoy ti panagsasalip dagti lokal a banda a nangipangeganda saan laeng a dagiti original Pilipino Music (OPM) ken Ilocano songs no di pay ti bukodda a komposision. Malaksid kadagiti napili a kalaingan a banda, naipaayan pay iti premio dagiti nagbalin a Best Guitarist, Best Vocalist, Best Drummer ken Best Original Composition.

Naiparada dagiti nagkauna a military jeep  ken bisikleta iti bigat ti Sabado, maikanem nga aldaw ti parambak. Nagrikus dagitoy iti Metro Vigan tapno iparangda no kasano a napapintas ken napagtalinaedda dagitoy iti laksid ti kinadaandan.

(Maigibusto)