Footer

SALAYSAY: Our Lady of Lourdes: Apparition ti Nailangitan nga Ina (Maikatlo a paset)

Ammo amin dagiti inna ti pagimbagan ken pagsayaatan dagiti annakna. Ammo met ti Nainlangitan nga Ina ti pagsayaatan dagiti annakna.

Iti pannakairakurak ti kaunaan a misterio ni Apo Jesus, ammo ni Ina Maria ti kasayaatan amin a para kadagiti tattao.

Ti Nainlangitan nga Ina ti nagkiddaw iti kaunaan a milagro nga inaramid ni Apo Jesus a napasamak iti maysa a kallaysa sadiay Cana. Pinagbalin ni Jesus a naimas nga arak dagiti binurnay a danum.

Saan koma pay a kayat ni Apo Jesus ti agmilagro, ta kas kunana, “saan pay a napapanawen.” Ngem ammo ni Ina Maria ti pagsayaatan dagiti agkallaysa, dagiti agpasken ken dagiti  dimmar-ay. Iti kinaawanen ti arak, nasken nga adda maiserbi. Nasken a saan a matukkol ti aklo. Isu a kuna ti Nainlangitan nga Ina: “Aramidenyo amin nga  ibagana…”

No iladawantayo ti napasamak ken dayta a balikasna nga “Aramidenyo amin nga  ibagana…” kaipapananna dayta a ti Ina ti mangibalballaet iti pagsayaatan ti tao. Isu ti makunkuna a Mediatrix of Graces.

Kastoy ti marikrikna dagiti amin a Marian devotee. Awan ti aniamanna kadakuada ti lam-ek ken pannakabasa. Kaskenan ti pannakatungpal dayta  naibaga nga “Aramidenyo amin  nga imbagana…”

Iti pudno a biag, saan a kinakomportable ti sumurot ken Apo Jesus. Saan a nanam-ay a biag. Saan a nalang-ay a biag. Saan a biag nga awanan ti pakasuotan. Masuot ti amin. Masuot ti pammati. Ti kinatibker.

Nasken nga aramiden ti pudno a sumursurot ken Apo Jesus amin a pagayatan ti Mannakabalin. Ta  kas kunana: “Asinoman a mayat a sumurot kaniak, nasken a baklayenna met ti bukodna a sangol…”

Sangol. Kas iti sangol ti nuang wenno baka. No naipako wenno naisingkaw daytoy, kayatna a sawen, adda  guyoden ti ayup wenno agtrabaho para iti amona. Situtudio nga agtungpal iti pagayatan ti amona.

Kastoy met ti tao a sumurot ken Apo Jesus. Masapul a situtudio nga agtungpal.

Saan ngarud a kinakomportable a biag ti panangsurot ken Apo Jesus. Saan a kinakomportable ti mangaramid iti pagayatan ni Apo Jesus. Timmao ni Apo Jesus a naparigat, nagtuok, nalais, nailansa iti krus, natay ken naitanem. Nagungar iti maikatlo nga aldaw. Kadagiti mayat a sumurot ken Apo Jesus, nasken a “baklayenda ti bukodda a sangol ken mailansada met iti bukodda a krus.”

Napipia pay dagiti deboto iti Baguio ta mabbasada laeng iti tudo wenno bagyo ken makariknada iti tumulang a lam-ek iti las-ud ti nasurok dua nga oras iti uneg ti sangapulo nga aldaw (siam nga aldaw ti nobena ken ti kaaldawan ti piesta). Mano met la daytan  no ikumpara iti mapaspasaran dagiti sabali?

Kadagiti sabali a Kristiano, agsagsagabada iti nakana a bisin ken waw. Agsagsagabada iti kinadangkok ti gubat. Agsagsagabada iti angol ken kinainhustisia. Agsagsagabada iti pannakairurumen. Agsagsagabada iti nakana a sakit. Agsagsagabada iti pannakapapatay. Dagiti dadduma, addada iti “impierno” a mangipadpaduyakyak iti pagayatan ti Apo.

Kadagiti dadduma a Kristiano iti nadumaduma a paset ti lubong, agtigtigergerda iti nakaro a lam-ek gapu ta awan ti naimeng a pagtaenganda — adda dagiti matmaturog kadagiti igid ti kalsada, iti sirok ti rangtay, iti underpass, iti overpass ken uray sadino la ditan nga awananda iti ules ken ikamen no di laeng karton wenno pagiwarnak. Agtigtigergerda iti bisin gapu ta awan ti makanda. Agtigtigergerda iti buteng gapu ta mapaspasamak iti lugarda ti gubat, ti riribuk, ti pammapatay. Agtigtigergerda iti kinainhustisia. Agtigtigergerda iti buteng ta naikawiten iti tengngedda ti natirad a kumpay ni Patay. Agtigtigergerda a matay…

Asino ngarud ita ti addaan iti naim-imbag a kasasaad? Mano met laengen aya dayta  nasurok dua nga oras a tigerger iti nakana a lammin? Mano met laengen aya dayta nasurok dua nga oras a pannakabasa?

(Adda tuloyna)

Comments are closed.