Footer

SARITA: SUBANG (Maudi a paset)

MAKALAWASEN nga awan ditoy balay ni Angelo, kumarkaro met ti iliwko iti apok.  Ngamin, no maturogkami,  isu ti mangrayray-aw kaniak:  agkaba-kabalio ti barukongko wenno aglagtolagto iti tianko. Sa la agsardeng no mabannog.  No nabannogen, agbirokton iti dedena. Itemplaak iti gatasna.  Agidda nga agsuso agingga a mairidep.  Papaidakto metten ta naglaing nga agling-et.

No kastoy a rabii, kasla mangmangegko ti natinggaw a garakgakna nangruna no ikiraidna iti karabukobna ti panagkatawana.  Kasla makitkitak dagiti matana a nakain-inosente ngem napnuan iti ragsak.

“Kumusta ngatan ni Angelo, baket?  Mayat met la ngata ti turogna?”  intimekko ken ni Sally nga adda iti abayko.  Nakaidda ngem manarimaan nga agbasbasa iti Bannawag a pangalaanna iti turogna.  “Amangan no agsangsangit ita.  Kaasi met ti apokok a mangbirbirok kaniak.”

“Agsangit, a, ta sangkalagipmo met.”

Nagballikidak ket simmangoak ken ni baket. “Talagan san a di ipasiar ni Dennis ti Angelo ditoy,”  nakunak.

Kinudkod ni Sally ti ulona, ngem awan ti nangegko a sungbatna.  Mauma ngatan iti ulit-ulitek  a saludsoden kenkuana.  Ngem ania ngarud ket diak maliklikan a lagipen ni Angelo.  Di mailibak nga isu ti paboritok nga apo.  Adda pay ketdin nabukel a karik a diakon uminom pay iti nasanger no agsublida ditoy Paras.

“Baket?”

“Ummm?”

“Ania ngata no pasiarek ni Angelo inton bigat.”

“Nagpintas daytan a kinunam, lakay!” kinunana. “Nasayaat met tapno mapnekka iti kaaldawam.”

“Dinak ngata katawaan ni Dennis?”

Ginuyodnak a pinasango ni Jelly.  “Saan met a kasdiay ti anakmo.  Naituredna laeng ti simmungbat iti dayta a rabii ta napunnuanen kadagiti sermonmo kenkuana.  Nasingpet ni Dennis.  Kas makitam, di met agsarday ti panagsapulna iti trabaho.”

Nakaangesak iti nalukay iti imbaga ni Jelly.  Kasla adda kulapot a naikkat iti barukongko a namaglukay iti panagangesko.

“Mapanak ngarud ‘ton bigat?”

“Wen,” kinuna ni baket.   “Mangitugotka payen iti ikan a pagsanguanyo ken ni                           abalayan. Maturogta ngaruden.”    Iniddepna ti flourescent lamp sa immabay a nakikaidda kaniak.

Kabigatanna, nakasaganaakon nga agpa-San Esteban.  Inkeddengko a dumagasak pay idiay ili tapno gumatangak iti regalok para kadagiti apok.  Ngem idi kitaek ti relo iti pungupunguak, nasapa pay.  Inyiladko iti papag iti sirok iti mangga iti paraanganmi ket nagpayubyobak.

Diak napuotan ti panakailibayko.  Ngem nagmulagatak idi kasla adda mangegko a garakgak ti ubing… ni Angelo.  Nagmulagatak ket tinaliawko ti aglawlaw.  Awan met.  Tagtagainep lang siguro, nakunak.

Nagkidemak manen, ngem adda manen nangegko a garikgik ti ubing.  Iti panangipagarupko a tagtagainep lang, diakon inkaskaso.  Ngem idi kuan, nariknak nga adda nagdisso iti bagik.  Naglag-oy-lag-oy pay, kagiddan ti natinggaw a katawama.

Nagmulagatak manen. Apagisu la ketdin ti pannakaipasabat iti matak ti nagsam-it nga isem ni Angelo.  Dagiti natinggaw a matana a mangmatmatmat kaniak.  Saannak nga agtagtagainep ta mariknak ti dagsenna iti tianko.

“Ti apok…” naiyarasaasko.  Bimmangonak ket insigida nga inarakupko, kagiddan ti panagarimasa ti matak.  Kasla adda panunot ni Angelo ta inyirutna met ti arakupna kaniak.

“Tay… tay…”  kinunana ket tinudokna ti agongko.

“He-he-he, ti apok!”  ginelgelko ti buokna.  “Apay nga itaka laeng?”

“Kayatdaka ngamin a sorpresaen, ’Tang,” kinuna ni Dennis.  Adda gayam a nakatakder iti sanguananmi.

“Addaka gayam dita, nakkong,”  kinuna.  “Ni Sally?”

“Addan dita uneg ti balay.”

“’Mayka man ditoy abayko, nakkong,”  inyawisko.

Natulnog nga immasideg kaniak.  Nagtugaw iti abayko.

“Dispensarennak koma no nasairko ta riknam. Kayatko laeng ngamin nga igaedmo ti agsapul iti trabahom ket addan ilangoymo a pamiliam,” nakunak.

“Awanen kaniak daydiay, ‘Tang,” kinuna ni Dennis. “Adda ket nagsayaatanna ta idi naammuan ni Tatang nga awan pay ti pagsapulak, inyasidegnak ken ni mayorda. Nairana met nga adda bakante para clerk ket siakon ti inselselna. Inawatko ti damok a sueldo idi kalman.”

Inlua ti tawa ni baket.

“Umaykayon,” impukkawna.

“Ne addan sa ketdi sagana ni baket,” nakunak. “Baka insaganaanna daytoy nga aldaw, ‘Tang,” immisem ni Dennis.

Naklaatak laengen idi makatadogkami iti salas. Adda naprito a manok, barbecue, pansit ken sangabotelia a Fundador!

“Happy birthday, lakay!” inkablaaw ni baket sanak inungnguan.

Diak nagawidan ti timmangad. Ay wen, gayam, kasangayko ita!

“Happy birthday, ‘Tang!” nakuna ni Dennis.

Diak ninamnama iti aramidenna: immarakup a kasla ubing, nga itana laeng nga aramiden.

Diak ammo ngem nagkiremkiremak ta maluyaannak metten!#

Comments are closed.