Footer

Naing-inget a kampania maikontra iti droga iti probinsia, imbilin ni Chavit

VIGAN CITY – Imbilin ni Gov. Luis “Chavit” Singson ti panangisayangkat ti kapolisan iti naing-inget pay a kampania maikontra iti droga iti probinsia.

Iti interbiona ken ni Jun Ramos a naipatangatang iti DWRS idi Marso 2, kinuna ni Singson nga imbilinnan ken ni PNP Provincial Director Senior Supt. Eduardo Dopale, Jr. ti panangisayangkatda iti panagsukisok kadagiti amin a balay a masuspetsa a paglakuan iti droga.

“Masapul a maserrek amin dagiti balay a pagsuspetsaan a paglakuan iti droga,” kinuna ni Singson  tapno malapdan ti panagraira ti droga iti probinsia.

Kinuna ti gobernador nga ingetan pay ti kapolisan ti kampaniada maikontra iti droga tapno saan a maipada ti Ilocos Sur kadagiti sabali a probinsia a nakaduktalan kadagiti naipasdek a shabu laboratory kas iti Pangasinan, La Union ken Ilocos Norte.

“Adu a tattao ti madadael no saan a mapasardeng ti panaglakuan iti droga,” kinuna pay ti gobernador idinto nga imballaagna kadagiti agnegnegosio iti maiparparit a droga nga isardengdan ti aglako agsipud ta saannanto a tulongan ida no matiliwda.

“… Isardengyon ti panaglakoyo iti droga ta dispensarenyo…saankayto a matulongan…” kinuna ni Singson.

Kiniddaw pay ti gobernador ti pannakitinnulong dagiti kaprobinsiaanna a mangipulong kadagiti mapagsuspetsaan nga  agnegnegosio iti droga iti probinsia tapno matiliw dagitoy.#

Comments are closed.