Footer

Electronic beds, naiwaras kadagiti district hospitals

TAGUDIN, Ilocos  Sur – Kas paset ti agtultuloy a panangpasayaat ti gobierno probinsial iti serbisio ti salun-at ditoy probinsia, sangapulo ket uppat nga electronic beds ti naiwaras kadagiti district hospitals itay Marso 10 ken 11.

Karaman kadagiti nabenepisiaran iti daytoy a gannuat ti gobierno probinsial ti Tagudin General Hospital, Sta. Lucia District Hospital, Salcedo District Hospital, Central Ilocos Sur District Hospital (Narvacan), Magsingal District Hospital, ken Sinait District District Hospital.

Uppat nga electronic beds ti naiyawat iti Tagudin GHCC idinto a sagdudua dagiti dadduma a district Hospitals.

Kanaig daytoy, nagyaman dagiti hepe dagiti district hospital iti pannakaipaay dagiti electronic beds idinto nga innayonda a napateg ti kaadda ti kastoy a klase ti kama iti ospital ta mausarda kadagiti totally bed ridden ken dagitay kritikal ti sasaadenna a pasiente.

Innayonda a lumag-an met ti trabaho dagiti nurses ta saanen a kasapulan pay ti manual a panangpuligosda tapno maingato wenno maipababada  ti aniaman a paset ti kama.

Kinuna dagiti hepe dagiti ospital a mangnamnamada a manayonan pay dagiti maited nga electronic beds tapno ad-adda pay a mapasayaatda ti serbisioda ken maguyugoy ti ad-adu a kaprobinsiaan a sumrek nga agpaagas kadagiti district hospitals iti probinsia.

Kinuna ni Gov. Singson nga agserbi koma dagitoy a proyekto kas motibasion kadagiti empleado ti ospital ti turay tapno igaedda ti agserbi kadagiti agkasapulan.

Kinunana a kasapulan a maksayan no di man mailaksid a maminpinsan dagiti reklamo dagiti umili mainaig iti serbisio ken pannakilangen dagiti doktor ken empleado dagiti ospital ta pagrebbenganda ti agserbi a sipupudno kadagiti umili.#

Comments are closed.