Footer

Bus, dinungpar ti motorsiklo, 2 nasugatan

STA. CRUZ, Ilocos Sur – Nagtungpal iti ospital ti nagkalugan iti maysa a motorsiklo idi dinungpar ti luganda ti kutit ti maysa a bus iti national highway ti Barangay Sagat, ditoy nga ili idi malem ti Marso 22.

Naitaray iti Candon City Hospital gapu kadagiti sinagrapda a sugat da Marcelino Gamatan, Jr. y Reyes, 24, naasawaan, fire officer, ken residente iti Barangay Tablac, Candon City ken ti inluganna a nainaganan Rowena Gamatan y Laranang, 28, naasawaan, ken residente iti Barangay Del Pilar, Tagudin, Ilocos Sur.

Iti inisial a panagimbestiga dagiti polis ditoy, agpada nga agpaabagatan ti Philippine Rabbit Bus a minaneho ni Nestor Barrona y Pataray, 68, naasawaan, residente iti M. H. del Pilar St., Zone 6, Bangued, Abra ken ti Euro MC a minaneho ni Gamatan idi naginayad ti bus tapno agidissaag ti pasahero ket mapapati a di napakadaan ni Gamatan gapuna a nadungpar ti motorsiklona ti kutit ti lugan.

Kabayatanna, nadunor ti dua a motorista gapu iti panagdinnungpar ti luganda iti national highway a sakup ti Barangay Poblacion Norte, Sta. Maria, Ilocos Sur idi sardam ti Marso 20.

Nagsagrap iti dunor da John Vincent Desierto y Holgado, 28, baro, ken residente iti Barangay Tamag, Vigan City ken ni Marivic Gliam y Dar, 41, naasawaan, ken residente iti Barangay Danuman East, Sta. Maria, Ilocos Sur gapu iti panagdinnungpar ti luganda a Honda Wave 100 ken Honda XRM iti kalsada nasional a sakup ti nadakamat a barangay iti agarup alas 6:20 ti sardam ti Marso 20.

Iti inisial nga inbestigasion dagiti polis, agpaabagatan ti Honda Wave 100 a minaneho ni Desierto idinto nga agpaamianan ti Honda XRM a minaneho ni Gliam ket iti nadakamat a lugar, kellaat a nag-u-turn ni Gliam a puon ti nakadamgisan ti lugan ni Desierto kenkuana.#

Comments are closed.