Footer

Naaresto iti buy bust operation, napilaan iti kaso

VIGAN CITY – Naipilaan iti nagsina a kaso ti drug pusher a naaresto iti buy bust operation ken nakakumpiskaan iti paltog, balbala ken drug paraphernalia iti follow-up operation nga insayangkat dagiti polis iti pagtaenganna.

Nakasuan ni Marlo Lim y dela Cruz, 36, naasawaan, residente iti Barangay IX, Vigan City iti City Prosecutor’s Office ditoy  siudad iti panaglabsing iti probiso ti PD 1866 ken RA 9165 mainaig iti pannakakumpiska ti maysa a paltog, balbala ken drug paraphernalia iti balay daytoy idi rabii ti Marso 16 iti search operation nga insayangkat ti nagtitipon nga elemento ti PAIDSOTG, Criminal  Investigation and Detection Group ti Ilocos Sur Provincial Police Office nga indauluan ni PCI Arbel Mercullo babaen ti superbision ni Vigan City Chief of Police Police Supt. Elpidio Nartatez ken babaen ti koordinasion ti PDEA.

Nakakumpiska dagiti nagsukisok iti balay ni Lim iti maysa a homemade caliber magnum 22 (paltik) nga addaan iti 7 a bala para iti cal. 22 ken maysa a bala para iti 5.56 MM, 1 tooter, 6  a lighter, 3 improvised lighters, 1 rolio ti aluminum foil, assorted plastic sachets, Motorola cellphone, 2 Nokia cellphones, ken assorted used plastic sachets a naglaon iti mapapati a shabu residue.

Sinaksian ti live-in partner ti suspek a maysa a Cory Pasaraba dela Cruz, 49, balo, dagiti barangay officials, ken maysa a reporter manipud iti Bombo Radyo ti naisayangkat  a panagsukisok babaen ti bileg ti search warrant nga inyisio ni Judge Francisco Ante, Jr. ti MTCC, Vigan City.

Naipatulod metten iti provincial prosecutor ti rekord ti kaso a panaglabsing iti Section 5 ken Section 11 ti Article II ti RA 9165 wenno Comprehensive Dangerous Drugs Act of 2002 a nai-docket  iti babaen ti NPS #1-03-INQ-IIC-00027 ken napetsaan iti Marso 17 para iti inquest proceedings.

Kadua ni Lim  a natiliw ni Eric Filart y Follosco, naasawaan, ken residente iti Barangay Cabalangegan, Vigan City iti buy bust operation nga insayangkat ti nagtipon  nga elemento ti ISCIDT, ISPAIDSOTF ken Bantay police iti Zone 4, Bantay, Ilocos Sur a nakakumpiskaan dagiti polis iti sumagmamano a heat-sealed transparent sachet nga agdagsen iti 14.69 grams (saan a 8 grams kas immuna a naipadamag) a mapattapatta nga agbalor iti P173,000 ken iti uppat a P500 a marked money.#

Comments are closed.