Footer

Privatization dagiti district hospitals, saan a pabor ni Chavit

VIGAN CITY – Saan a pabor ti gobernador iti proposal a maipapribado dagiti amin nga ospital ti gobierno ditoy probinsia.

Daytoy ti imbatad ni Gov. Luis “Chavit” Singson a pagtaktakderanna mainaig iti maysa a proposal a privatization dagiti district hospitals ditoy probinsia.

Kinuna ni Singson a nupay dakkel ti masalbar ti gobierno probinsial a kuarta no ma-privatize dagiti district hospitals, saan a kumanunong iti nasao a proposal agsipud ta ngumina ti magastos dagiti umili no mapanda agpaagas iti ospital.

Inlawlawag ni Singson a sakbay a naiyawat dagiti ospital ti gobierno iti probinsia, awan ti ania a problema iti salun-at ngem idi nai-devolve dagiti government hospitals iti probinsia, agkurkurang met dagiti pondo a maited para kadagitoy ket ti provincial government ti nagab-abonar kadagiti pagkuranganda tapno di bumaba ti kalidad ti serbisio ti salun-at iti probinsia.

Kinuna ni Singson a manipud iti P100-200 milion ti ab-abonaran ti gobierno probinsial iti makatawen ket dakkel ti masalbarna no ma-privatize dagiti district hospitals.

“Dayta pannaka-privatizena (district hospitals), dakkel ti masalbar ti probinsia… ngem saanko a kayat agsipud ta awanton ti pagtarayan dagiti kailiantayo,” kinuna ti gobernador sana innayon a ngumina ti magastos dagiti umili iti pannakayospitalda.

Kinuna ti gobernador a nangina ti singir dagiti pribado nga ospital kadagiti pasiente ket ad-adda la ketdi a maparigatan dagiti umili.

Kabayatanna, kinuna ni Bokal Jerry Singson a nakatungtongna ti gobernador kalpasan ti consultative meeting mainaig iti privatization ket imbaga daytoy a saan a prioridad ti gobierno probinsial ti pannaka-privatize dagiti district hospitals iti probinsia.

“Segun iti gobernador, mabalin a ma-privatize dagiti negosio ti gobierno a pakairamanan ti Multi-line Food Processing Plant, airport, seaport, ken dadduma pay a government business establishments ngem second priority laeng dagiti government hospitals,” kinuna ti bokal.

Innayon ni Singson nga amken ti gobernador a saan a maited dagiti kangrunaan a kasapulan iti salun-at  dagiti marigrigat nga umili no maipribado dagiti government hospitals.#

Comments are closed.