Footer

Special election para iti umuna a distrito ti Ilocos Sur, maangay inton Hunio: Comelec

MANILA – Kinuna ti maysa nga opisial ti Commission on Elections a mabalin a maangay inton Hunio daytoy a tawen ti special elections para iti nabakante a puesto ti diputado iti umuna a distrito ti Ilocos Sur.

Kinuna ni Comelec Chairman Sixto Brillantes bayat ti maysa a press briefing a naangay itay nabiit a tentatibo a nagpapatanganda iti en banc a maangay ti espesial nga election para iti umuna a distrito ti Ilocos Sur a binakantean ni dati a Cong. Ronald Singson kalpasan a sinentensiaan ti korte ti Hong Kong a maibalud iti makatawen ket kagudua mainaig iti kasona  a drug trafficking.

Naammuan iti nasao nga opisial a pormal a naawatdan ti resolusion a panagbakante ti umuna a distrito ti Ilocos Sur maigapu iti pannakaikkaten ti nagan ni Singson iti listaan ti  House of Representatives.

Indatag ni Singson ti panaglusulosna kas diputado idi Marso 1 sumagmamano nga aldaw kalpasan ti panangsentensia kenkuana ti Wan Chai District Court iti Hong Kong a mabalud iti 18 a bulan gapu iti panagikutna iti maiparparit a droga.

Kas sagudayen ti linteg, maikkan ti Comelec iti 90 nga aldaw a mangituding iti pannakaangay ti eleksion kalpasan ti pannakaawatna iti resolusion ti panagbakante ti umuna a distrito ti Ilocos Sur.

Kinuna pay ni Brillantes a posible a manumano ti panagbilangan iti butos iti maangay nga espesial nga eleksion.

Naaresto ni Singson idi Hulio 19, 2010 iti Check Lap Kok Airport kalpasan a naduktalan iti ikutna ti 6.67 gramo a cocaine ken dua a tableta ti Nitrazepam wenno Valium.

Ni pay laeng House Speaker Feliciano Belmonte ti agpaay a caretaker kabayatan ti kaawan ti mangibagi iti umuna a distrito ti Ilocos Sur,

Iti maysa nga interbiona iti radio, kinuna ni Gov. Luis ‘Chavit” Singson a konsultaenna pay dagiti lider ti probinsia no asino ti ipasangoda para diputado iti umuna a distrito.

Maal-alimadmad a kumandidato ni Singson para diputado iti nabakante a distrito no agtaray ni dati a bokal Efren Rafanan, Sr.#

Comments are closed.