Footer

4 natay iti nagsisina nga aksidente ti lugan

BANTAY, Ilocos Sur – Nagsasaruno dagiti aksidente ti lugan a napasamak iti uppat nga ili ditoy probinsia a nakatayan ti uppat a tao.

Iti report a simmangpet iti provincial police office ditoy, napasamak ti aksidente a nakainbolbaran ti lugan iti Poblacion, San Ildefonso idi Marso 24, iti Villa Quirino, San Esteban idi Marso 26, iti Barangay Aggay, Bantay ken iti Sitio Bissayot, Barangay Comillias Norte, Cervantes, Ilocos Sur idi Marso 28 a nakatayan da Edsel Rabaca y Magno 19; Reynanto Espanto y Guerzon, 19; Dennis Antiporda del Castillo, 40; ken Albert Ambas y Walding, 51.

Iti San Ildefonso, napasamak ti aksidente iti barangay road a sakup ti Poblacion West idi agarup 8:10 ti rabii ti Marso 24 gapu iti mapapati a pannakapukaw ni Edsel Rabaca y Magno, 19, awanan asawa, ken residente iti Barangay Parada, Sto. Domingo, ti kontrolna iti manibela iti Honda TMX 155 a minanehona ket dinungparna ti poste ti elektrisidad a nagsagrapanna kadagiti sugat.

Intaray dagiti polis ti biktima iti Metro Vigan Cooperative Hospital ngem indeklara ti doktor a nangtaming kenkuana a dead on arrival.

Mapapati a nakainom ni Rabaca idi maaksidente.

Dua a motorsiklo ken Isuzu Elf ti nainbolbar iti aksidente iti national highway a sakup ti Barangay Aggay idi agarup alas 7:20 ti rabii ti Marso 28.

Segun ti report, agpaabagatan ti Isuzu Elf a minaneho ni Rosenel Ramos y Taja, 33, residente iti Baliw, San Juan ken ti nangisit a Euro 110 a motorsiklo a minaneho ni Ludibino Peredo y Palacpac, 33, naasawaan, residente iti Zone 2, Bantay ket bayat ti panagdaliasatda iti Barangay Aggay, inobertekan ti Isuzu Elf ti Euro 110 ngem mapapati a nasapgidna daytoy a puon ti nakapukawan ni Ramos iti kontrolna iti manibela ket kimmaut iti bangir a linia ti kalsada a nagtungpal iti panagdinnungpar ti Elf ken ti asul a Euro 110 a minaneho ni Dennis Antiporda del Castillo, 40, naasawaan, residente iti Bulag West, Bantay.

Nagsagrap iti dunor ni Analyn Peredo y Torio a nakilugan iti nangisit a Euro 110 ken da Jerick del Castillo ly Velasco ken Alden del Castillo y Tadena a nakilubbon iti asul a Euro 110.

Naitaray dagiti biktima iti Metro Vigan Cooperative Hospital ngem pimmusay ni Dennis del Castillo bayat ti pannakaagasna.

Boluntario a simmuko iti polis ni Ramos.

Iti aksidente a napasamak iti Tay-ac road iti Sitio Bissayot, Barangay Comillas North, Cervantes, mapapati a napukaw ni Zaldy Leniasan y Pantoc, residente iti Barangay Cabitin, Mankayan, Benguet, iti kontrolna iti manibela a puon ti nakatinnagan ti passenger jeep a minanehona iti spillway.

Nagsagrap ti kadenna ti drayber a ni Albert Ambas y Walding, 51, naasawaan, residente iti Sitio Maduto, Barangay Cabitin, Mankayan, Benguet kadagiti dunor iti nadumaduma a paset ti bagina ket naideklara a natayen idi maidanon iti Bessang Pass Memorial Hospital.#

Comments are closed.