Footer

Nakainom a motorista, dimmungpar iti motorsiklo

CANDON CITY – Dika agmaneho no nakainomka, leksion daytoy ti maysa a lalaki kalpasan a naidungparna ti luganna iti motorsiklo a nagluganan ti maysa a polis.

Naammuan iti report a bayat ti ilalasat iti krosing iti national highway a sakup ti Barangay San Juan, ditoy siudad ti XRM motorcycle a minaneho ni PO1 Bryan Naungayan y Apilado, 22, baro, nakadetalye iti police station ditoy siudad, ken residente iti Barangay Talogtog, ditoy met laeng siudad, idi dinungpar ti napaspas ti tarayna nga agpaamianan a TMX a traysikel a minaneho ni Jeffrey Gasatan y Villanueva, 47, naasawaan, awanan iti lisensia ken residente iti Barangay Paypayad, Candon City.

Gapu itoy, nagsagrap ni Naungayan iti dunor iti ulo, natukkol ti makannawan a ramayna ken garumiad iti nadumaduma a paset ti bagina.

Naitaray ti polis iti Rasonable Hospital para iti pannakaagas dagiti dunorna.

Nakainom iti arak ni Gasatan, segun iti doktor a nangtaming kenkuana.#

Comments are closed.