Footer

300 mannurat, manamnama a tumabuno iti Maika-43 a Gumil Filipinas Convention

CABUGAO, Ilocos Sur – Manamnama nga agatendar ti nasurok tallo gasut a mannurat manipud iti nadumaduma a lugar ditoy pagilian ken iti ballasiw-taaw iti Maika-43 a Kombension Nasional ti Gumil Filipinas a maangay iti Cabugao Beach Resort ditoy nga ili inton Abril 15 -17.

Manamnama a dumar-ay iti kombension dagiti Ilokano a mannurat manipud iti probinsia ti Ilocos Sur, Ilocos Norte, La Union, Pangasinan, Cagayan, Isabela, Nueva Vizcaya, Tarlac, Metro Manila ken dagiti kamannurat manipud iti Hawaii, California, Greece, Italy ken dadduma pay a pagilian.

Ni Dr. Priscilla Supnet-Macansantos, chairman ti National Commission for Culture and the Arts’ National Committee on Literary Arts (NCCA-NCLA), ti keynote speaker iti daytoy a kombension a naawagan iti Dap-ayan 2011 wenno disso a pagtitiponan dagiti agindeg tapno pagpapatanganda ti isyo wenno bambanag a pakaseknanda ken ti lugarda.

Tubo ti Narvacan, Ilocos Sur ken chancellor ti University of the Philippines-Baguio, trataren ni Macasantos ti tema ti kombension a “Papanam, Literatura Ilocana?”

Karaman dagiti naipangruna nga aktibidad bayat ti kombension dagiti session maipapan iti literatura, pasalip iti panagbasa iti daniw para kadagiti ubbing nga agtawen iti 9-10, pannakayawat dagiti premio dagiti mannurat a nangabak kadagiti nadumaduma a salip iti sarita, pannakailako dagiti libro, pannakapili ti Miss Gumil Filipinas, pabuya iti kultura ken pannakaiyalnag dagiti antolohia dagiti ababa a sarita  a pakairamanan ti “Karapote” ni Ariel Tabag, “Nabalitokan a Tawid”, napili a sarita dagiti miembro ti Gumil, ken dagiti putar ni Joel Manuel a naipalaon iti “Ti Balay ni Major Sato ken Dadduma pay a Sarita” ken “Itlog ti Kabinian ken Dadduma Pay a Sarita”.

Maiyalnag pay bayat ti kombension ti “English-Iluko Dictionary for Court Interpreters and Home Home Use” ni Rafael Alimbuyugen, ken maiyalnag manen ti antolohia dagiti sarita ni Sherma E. Benosa a “Dagiti Babassit nga Alipugpog ken Panagbiahe”, ken antolohia dagiti Iloko a dandaniw ni Aida Tiama.

Idi 2001, indeklara ni Presidente (idi) Gloria Macapagal-Arroyo ti Abril a kas Iluko Literature Month.#