Footer

Semana Santa: Ti Siete Palabras Iti Uppat A Dekada (Umuna iti tallo a paset)

Dagiti maudi a pito a balikas ni Jesus sakbay ti ipapatayna:

1.“Ama, pakawanem ida ta dida ammo ti ar-aramidenda….” (Lucas 23:34)

Naibaga daytoy ni Jesus kalpasan a nailansa dagiti soldado dagiti ima ken sakana iti krus. Saan a kinabuteng ni Jesus dagitoy a nangidadanes iti bagina no di ket kinaasianna ida babaen kadaytoy nga inkararagna iti Ama Mannakabalin.

Dida ammo ti ar-aramidenda ta dida magaw-at dagiti lapayagda, ngamin kudkudkoden ti balisungsong ti alipusposda iti timidda. Inareb-ebdat’ digo, sinimotda dagiti lasag-lauya, insublida iti dungdong dagiti tulang a sinepsepanda sada manen diniguan ken induol kadagiti natali a bituka. Iggemdat’ ipus ti ari dagiti dingraw, ket no agdiskursoda, ti bukodda met laeng a bagi ti palpalakpakanda. Naglalaingda nga agdiskurso kadagiti kulot a balikas, asinoman a mangbarusngi kadkuada, maipalnaaw a dina oras. Ipasindayagdat’ kinalaingda nga agkanta iti osana ngem ag-agkandat’ balinsuek a krus a kuentasda. Nalaingda a mangpuyot apuy-lampara dagiti nagtagisilaw, amin a suli ket panagparti-panagipalnaaw. Kadagiti nagpartian, tinugawanda ti balikas-araraw ken saning-i, dida man la nariknat’ dengngep ultimo kalalailoan nga umbi. Imkis ti lubong kadagiti insaruagda a tabukol panagparti ngem inkantada ti oda dagiti tirtiris, munieka ken bambanti.

2.“Eli, Eli, lama sabachtani?” (Mateo 27:46)

Iti tengnga ti aldaw, nagsipnget ti intero a daga ket nagpaut iti tallo nga oras. Idi dandani alas tres ti malem, impukkaw ni Jesus iti napigsa a timek:  “Eli, Eli, lama sabachtani?” a kayatna  sawen, “Diosko, Diosko, apay a binaybay-annak?” Iti linak-amna a rigat, ammon ni Jesus a daytoyen ti panawen a panangsangona a maymaysa ken ni Patay.

Diosko, Diosko, apay a binaybay-am? Inlansada dagiti dakulapna tapno dina masangga dagiti arrabis ken tungpa. Inlansada dagiti sakana tapno di makakamang kadagiti kaarrubana. Ket naawagan a ‘mamasirib’ ken naidayawda kas idolo dagiti natali a bituka dagiti nagilansa kenkuana. Ti kinalida nga abut dimman-aw iti kulturat’ kinasadut. Kulturat’ duol – a pagbibinggawan dagiti naipuruak a tinapa a binuot idinto ta ham ken bacon ti kuskusayan dagiti dobermanda a kulot. Nasipnget ti rupat’ dulpet nga ubing nga agkalkalkal iti basura sananto buyaen dagiti agay-ayam iti golf ken sennaayan ida. Sennaayan…

3. Kinuna ni Jesus ken Maria nga inana: “Babai, adtoy ti anakmo.” Ket kinuna met iti adalanna (a ni Juan): “Adtoy ti inam.”(Juan 19:26-27)

Daytoy daydi yaasideg ni Ina Maria ken Juan iti krus a sibabayog pay laeng ni Kristo. Kaduada ditoy da Maria Magdalena ken Maria nga asawa ni Cleofas.

Naggaatiddog dagiti ima a kimpet iti nakadakdakkel nga ima. Isuda dagiti kumamkammet iti bagas iti burnay ken agsibbarut subo nakatanggaya nga ima a naruay. Nagpupuner dagiti ramramay a nangbekkel kadagiti imkis a kararua. Ti sallapingaw natarimbangon iti panagngudot’ panawen iti namin-adu a daras a dandani tinallikudan ti angin. Natamdaganna dagiti babak, nagkullayaw, nanguros; pinidutna dagiti tugotna sana sineksek ida nga inurnos; nagpili pangiyawatannat’ trono, ket nadutdotna ti katunggalina – naisipna ngata a daytoyen ti subbot iti layus a biddutna.

Rigodon, appok ida, rigodon de honor, sala dagiti natiri a di mamati ken di mangitulok a tumakder katunggali. Imkis taga-daya, nangemkem taga-amianan, lalo ni kapungan,  ni apo baknang naalsem ti isemna, nagpungtot taga-abagatan, nagpangta dagiti kakadua a nakariknat’ pannakalipat, ti asot’ kaarrubana tinung-edanna ti amona tapno inda lumib-at, ti dakkel nga anniniwan sililimed a nagkaradap, ammona pangdutdutdotanna kangrunaan nga alas ti arapaap.

Nagsubli ti katunggali tapno awatennat’ setro ngem iti tarmac nagballigi ti bileg ti nangisit a kabalio. Nakitak daydiay ubing, bato inna impallangatok ngem iti tuktokna met laeng a nanaltuok, iti panagdarat’ lulonanna, saem ti nariknana nga umukuok. Timmaliaw Kinuna ti Timek: “Babai, adtoy ti ilim…!” Ket sinungbatan ti babai: “Adtoyakon…adtoy toy tinagtagibim!” Intag-ay ken inappupo dagiti nakaad-adu a gemgem ti babai ket rinebbana ti pader-bartolina.

(Adda tuloyna)

Comments are closed.