Footer

TARAON TI PANUNOT: Ti annongen ti asawa a babai (Maudi a paset)

Adda tay kunada nga agpatingga met ti aanusan ti maysa a tao. Ket no mapunnon ti salup, agsapul metten iti nawaywaya a pakapnekan.

Iti dayta a malem a kagapgapu ni Rina iti tong-itan, nagderetso iti kusina tapno mangilabban. Dina dinagas ni Angelo nga anakda iti balay da Nang Undis nga inana.

Saan a nadatngan ni Rina ni Mising. Impagarupna lattan a napan nagala ti asawana iti bugbogenna a kanen dagiti baboyda. Wenno napanna innala dagiti tarakenda a nuang tapno yaponna idan.

Nangan. Madaman ti ngalngalna idi mataldiapanna ti sobre iti rabaw ti repriheratorada. Napanna innala ket binasana ti linaon ti surat: Rina, asawak… Iti kanito a basbasaem daytoy suratko, addaakon iti bus nga agturong iti Baguio. No apay a pimmanawak, sika laeng ti makasungbat iti dayta a banag. Dinakon nga urayen a sumangpet, nasakit man, wen, awan ti kasinsakitna, lalo ket maadaywak ti anakko, ngem dumtengto ti aldaw a maawatannanto no apay nga adda torpe a lalaki nga agayat. Torpe a lalaki, wen, isu dayta ti kunkunada kaniak, pudno man dayta wenno saan, saanen nga isu ti napateg, ta ti kapapatgan amin ket ti panangbirokko iti makaawat met kaniak. Kastan, Mising.

Kasla nasuyatan iti sangadram a nalamiis a danum ni Rina kadayta a gundaway. Dina ninamnama daytoy nga inaramid ni Mising.

Napalabas ti makalawas, mariribukan unayen ni Rina. Saan laeng a maikawa no di pay sangkarengreng ti anakda no sadino ti yan ti amana. Kinasarita ni Rina da Ikitna nga Isiang ken ni Inangna nga Undis. Nagpaisuro no ania ti aramidenna.

“Dayta ket ti ibagbagak kenka idi. Saanmo unay a labsen ti tratom iti asawam, kunak, ngem ania ti inaramidmo? Arigna la saan nga asawa ti nangibilangam kenkuana. Imbes koma nga agyamanka ta nakatumpongka iti manakem ken nagaget a pamkuatan koma a makibadang, ngem saan! Saanka a dimngeg, ania ngarud ita?”

“Nanang, anti, ania ti aramidek itan?”

“Agpaisurokan ken ni Insiang, ta innak pay agnateng iti bunga ti utong sadiay bangkag ta adda idengdengko no malem. Panawankayo pay…” kinuna ti inana.

“Saanmo a sinurot ti umno a dana ti agassawa, kaanakan, isu nga inaponannaka iti pagparikutam.”

“U-umno a dana ti agassawa, kunayo Anti Isiang? Ania ti kayatyo a sawen?”

“Manipud kadaytoy Biblia nga iggemko, mabasa iti surat ni San Pablo kadagiti taga-Efeso 5:22-24: ‘Babbai, paiturayankayo kadagiti assawayo, a kas iti panangituray ti Apo kadakayo. Ta adda turay ti lalaki iti asawana, a kas kinaadda ti turay ni Cristo iti iglesia. Ni Cristo a mismo ti Mangisalakan iti iglesia a bagina. Iti kasta, masapul a paiturayan dagiti babbai kadagiti assawada iti amin a banag, a kas met iti iglesia a paiturayan ken Cristo.”

Saan a makatagri ni Rina. Nakadumog. Inaminnan nga isu ti nagbiddut.

“Daytoy pay, manipud iti Surat ni San Pablo kadagiti taga-Colosas 3:18: ‘Babbai, agtulnogkayo kadagiti assawayo, ta dayta ti rebbengyo nga aramiden a kas Cristiano.’ Dayta. Maawatam kadi?”

“Ania ti kayatyo a sawen, Anti Isiang?”

“Ti inaramidmo ken ni Mising nga asawam ket saan a maiparbeng. Saankayo a nagkatunosan agsipud ta adayo unay a nangatngatoka ngem isu. Saanmo a dinayaw ken sinaluadan ti kinaasinona, a kas ama iti pamilia.”

“Ania ngarud iti rumbeng nga aramidek itan, anti?”

“Ay, ket, surotemon a ni Mising ket agpakawanka. Ibagam nga agbalbaliwkan, nga isu met ti pudno nga aramidem. Agbalbaliwkan a talaga!”

Ket sinukon ngarud ni Rina ti asawana. Nagpakawan. Insangitna pay ti panagkarina nga agbalbaliwen. Nga isu ti napasamak iti panagbiagda, ket naaddaanda iti naannayas ken natakneng a biag. Nanayonan pay iti maysa a lalaki ti anakda, ket lalon a rimmagsak ti pagtaenganda, ta ngamin addan kadakuada nga agassawa ti panagtinnunos ken panagraem tunggal maysa– nga isu ti saguday ti naurnos a pamilia.#