Footer

2 nalmes iti panagdidigosda iti beach resort

CANDON CITY  – Kalgaw ket paborito dagiti tattao a pagpalamiisan iti baybay. Ngem ti daytoy met a tiempo a pakairepreportan dagiti malmes bayat ti panagdidigosda iti baybay kas iti napasamak iti dua nga ili itay nabiit.

Maysa a lalaki ti naireport a nalmes iti maysa a beach resort iti Barangay Pug-os, Cabugao, Ilocos Sur idi Abril 17, maysa ti nalmes iti Candon Beach Resort iti Barangay Darapidap ditoy siudad idi Abril 20, ken maysa ti dandani nalmes iti Sabangan Beach Resort, iti Barangay Sabangan, Santiago iti dayta met laeng nga aldaw.

Iti report manipud iti polis ti Cabugao, naggiinom da Ernesto Guzman y Ruizo, 52, mannalon, residente iti Barangay San Isidro, San Juan ken kakabagianna iti nadakamat a beach resort iti agarup 3:15 ti Abril 17 ket timmapog ti biktima tapno agdigos.

Mapapati nga inyagus ti koriente ni Guzman nga impatengnga iti baybay.

Inalaw dagiti immarayat a kakaduana ni Guzman ket pinadasda a paungaren sada intaray iti Suero General Hospital ngem indeklara ti attending physician a natayen.

Naideklara met nga awanen ti biag ni Mario Masigla y Rodeo, 45, naasawaan, dental technician, Islam convert ken residente iti Block 101, Lot 1, Sitio Imelda, Upper Bicutan, Taguig, Metro Manila idi maidanon iti Saint Martin de Porres a nakaitarayanna.

Iti inisial a panagimbestiga dagiti polis, simmangpet ti biktima ken ti pamiliana iti Candon City iti alas dies ti aldaw ti Abril 20  ket napanda nagdidigos iti Darapidap Beach iti agarup alas 3:00 ti malem.

Mapapati nga inyanud dagiti dalluyon nga impatengnga iti baybay ti biktima a puon ti nakalmesanna. Pinakatan dagiti nagresponde a polis ti biktima iti CPR ngem saanen a nakaungar pay.

Kabayatanna, baro a biag ken ni Fritzie Rodriguez, 26, residente iti Barangay Sto. Tomas, Candon City gapu ta sigida a naipakatan iti resuscitation ti doktor ti Santiago municipal oealth office.

Napan nagdidigos ti biktima a kaduana dagiti kakabagianna iti Sabangan Beach idi aldaw ti Abril 20.

Pagsayaatanna ta nadlaw a dagus dagiti kadua ti biktima ti pannakalmesna ket sigida nga inalawda sada intaray iti municipal health office a nakapaungaranna.

Naiyalis ti biktima iti Candon General Hospital para iti naan-anayna a pannakatamingna.#

Comments are closed.