Footer

Semana Santa: Ti Siete Palabras Iti Uppat A Dekada (Maikadua iti tallo a paset)

Simrek anaraar namnama. Nakimat dagiti payak sallapingaw, natnag ballasiw-taaw. Daydiay bandos a naiyuges tangatang, kinurnuan lubong. Nagtamed managayat sinamar, ul-ulo a nalimbong. Anian daydi, nagimnasen puyupoy baro nga agsapa. Ngem idi umaldawen, ti bandos nagpukaw lawagna ta maysanmaysa nangbigbig a sinelasnat’ dina met kukua, rimmimbaw panagkammet kadagiti nakabalunet. Nagbaliw yabayab, appok ida, nagpukaw asuk anglem, idin dimmapo natali a nisnis, naipalais iti angin-malem. Makakettang aguray iti dengngep kadagiti nagpasaran a kammuol ken dugol iti rupat’ napalabas ta di mabirokan ti sabot a pangadaw impaagen a beggang iti dalikan. Eppes dawa dagiti kararag iti altar a matemtemtem, ta ngamin no nasapat’ lulem awan tudo iti malem. Adda pay nabuya kadagiti plasa a panagipugpugsoda ngem iti lulonanda met laeng nagdissuan saruada. Ne, apayen, pagin-inumanda met tinakaw a kopita? Insublida nga inwara kalkalsada dagiti inurnongda a basura. Anian, appok ida, inawaganda a panangdalus iti pitakpitak a baboy babaen panangpuor ubongna a naimatangak. Pinukanda puon mangga kabayatan a nakabatayda kadagiti sanga ken agburburas kadagiti bunga. Indaniwda met laeng dagiti berso daan a kapitolo. Saan a nabuniagan agsapa a kabarbaro ta dina nabaraan malammin agpaypayegpeg nga ulo. Saan a nakauray dagiti mabisin ad-adda ketdi a nabisinan, ta idi agmatuonen makasiniten darang. Intag-ay dagiti mannalon iti Hacienda Luisita ti gemgemda ngem pitot’ naparti kadakuada a naiyatang iti Mendiola. Daydiay nagtektek a saltek naipit iti bautek ta nagballatek iti matemtemtem a putek; awan latta agas an-anek-ek. Appok ida, naulit pasamak, kas iti sallapingaw, di nailasin babai dagiti nangisit a karnero iti puraw a kalapaw. Nakitanat’ dingraw ket pinitikna ngem dina nakita dagiti anay a nagbalay iti pandilingna, naimbag ta adda tabako iti abay a dugsak dagiti gayamo a mangagaw setro nga impalay. Isu a panagbayad, appok ida, simmaruno nga eksena a nakalkaldaay. Ti nagbayadan nagdalus kadagiti rinet napalabas nga alingget. Sinangona dagiti dimmuprak ngem dagiti bungat’ ling-et naipanget ta agingga iti agdama, marikna pay laeng dagiti tupek iti langdet. Ngamin imbuangnat’ ridaw, nagawis-nagguyod kadagiti baniaga ket isuda met itan ti agipalpalok lansa iti impadeppada. Kunak no anaraar iti panangtallikudna pulpito ngem gayam nagpaubba ken simmuso kadagiti sangaili. Da Lakay Pidiong ken Tandang Claro nga innak tangtangaden nakamisuotda ta nagpalauden yabayab a di magalem.

Imkis manen masa. Napipian puruak a tinapa iti dulang namnama. Ngem di makapatik-ab agbuybuya laeng iti pelikula.Ta ultimo moralidad, natnag iti tukot daga. Bangungot! Riing. Bangungot! Ibabangon. Uliten! Uliten!

Tek tu. Sabali man pay nga ina. Maminsan man pay, maminsan. Kasla dawat lucky nine daytoy, appok ida. Ti ina manangisalakan. Ta ina ngarud ket ammona rikna maysa nga ina. Naulit pasamak. Intag-ay naawananen iti namnama. Ngem ad-adda ketdi panaglamak iti naipadeppa nga ina linak-amna aminen a kusit ken kinadamsak.  No idi ket iti sirok lamisaan iti pagkimaran, ita, karamanen a kinimardat’ lamisaan. Nagsat dagiti sinturon. Manglangan asuk kasuoran, awanen iti maadaw a beggang iti dapogan, ul-ulilat’ dulang, nangarruba da Moning ken Labang. Nalukaisan dagiti pimmutek a gurongna iti gagemna nga agtalinaed palangkana iti panangkompasnat’ chacha. Gimmil-ayab abagatan iti aramid a dina maawatan, ta ultimo simat’ banniit kadagiti bibigna dina maibugasan. Ay, nagbirtud, appok ida, nagbirtud a mangam-amling ti nangisit ken nagbiag a sallapiding iti pingping!

4. “Mawawak”(Juan 19:28)

Ammo ni Jesus a nalpas aminen. Tapno matungpal ti kuna ti Nasantoan a Surat. “Mawawak.” Kinunana. Adda ti maysa a burnay sadiay a napno iti naalsem nga arak. Nangipasagepsep dagiti soldado iti maysa espongha iti arak sada inkabil iti murdong  ti pika ket inggaw-atda iti ngiwatna.

Mawaw iti diro, kas apit iti uyokan dagiti kaarrubana. Dagiti kuting idi tinagtagibina isuda itan tigre iti deppaarna a pagararawan duol, pakidilamutan murkat ken arasawda.  Toy ina, tigre idi a nagbalin a mamirmiraut a kuting, an-anusannan a kirkiriten linati pitpit a binting.

Makawaw paulit-ulit a misterio nangisit a libro, awan anag dagiti tekken ken gaod liturhiat’ siglo. Danum! Dagum! Danum dagiti agum. Dagum dagiti babassit. Iti danum, tumpaw barko dagiti agum, lumned dagum dagiti babassit, ta napuyotan basisaw dagiti di makarikna iti pannakawaw. Makawaw, makawaw nga urayen, panagawid dagiti muging a tawtawataw…

(Adda tuloyna)