Footer

Agkabsat, nagtinnagbat, 1 natay

STO. DOMINGO, Ilocos Sur – Nagtungpal iti trahedia ti panangselebrar ti maysa a residente iti Barangay Laoingen ditoy nga ili iti panagkasangayna kalpasan ti panagtinnagbatda nga agkabsat idi malem ti Abril 27 gapu iti riri a pinarnuay ti arak.

Naitaray iti Magsingal District Hospital ni Abraham Molina y Molina, 44, naasawaan, ngem indeklara ti doktor a nangtaming kenkuana nga awanen ti biagna.

Naipan met ti suspek agraman dagiti bolo a naaramat iti pannagbat iti police station.

Segun iti report, naggiinom ti agkasangay ken ti kabsatna ken dadduma pay a kakaduada idi simmangpet ti amada a ni Prismo Molina y Balallo ket naginana.

Mapapati nga inasitgan ni Jimmy Molina y Molina, 33, naasawaan, agnaed met laeng iti nadakamat a lugar, ti amana sana kinulata babaen ti gauge 12 shotgun.

Nangala ti biktima iti bolo ket tinagbatna ti suspek a nagsagrapan daytoy iti dunor iti makannigid nga abagana.

Nangala met ti suspek iti bolo ket tinagbatna ti kabsatna a nakapuruan ti makannigid a barukongna.#