Footer

PNP provincial director, nasuktan

VIGAN CITY – Nasuktan ti provincial director ditoy gapu kadagiti nagsasaruno a pammapatay iti probinsia a pakairamanan ti pannakagudas ti maysa a barangay captain ken polis iti asideg iti provincial capitol idi Abril 11.

Ni Police Senior Supt. Reynante Partible, hepe ti police civil relations iti rehion ti natudingan nga officer in charge iti provincial command kas sukat ni Senior Supt. Eduardo Dopale a naka-on leave of absence.

Immun-una ngem daytoy, pinaayaban ni Singson ni Dopale ken dagiti hepe ti polis iti probinsia gapu iti saanna a pannakapnek iti naiwayat a panagimbestiga ti kapolisan mainaig iti pannakapapatay ni Daclapan Barangay Captain Wilfredo Terrago ken ni SPO1 Rommel Rebuldela, PNP member a nakadestino iti Ilocos Sur Provincial Police Office, Bulag, Bantay, ken nakasugatan ti maysa a bystander iti mapapati nga engkuentro iti abagatan a paset ti provincial capitol iti pasado alas dose ti malem ti Abril 11.

Iti pannakaisurat daytoy, awan pay ti naaresto a suspek iti pammapatay.

Sakbayna, rinelibo ni Dopale ni Police Supt. Elpidio Nartates, hepe ti polis ti Vigan City, gapu iti mapapati a pannakalabsing ti integrated police patrol system isu a napasamak ti pammaltog.

Bayat ti dialogo a naangay iti Baluarte a pagtaengan ti gobernador, kinondenana ti naladaw a panagresponde dagiti polis iti shooting incident gapuna a nakatakiasen dagiti nagisayangkat iti pammapatay idi makadanonda iti nakapasamakan ti krimen.

Binabalaw pay ni Singson ti kinunana a saan a nainsiriban a pannakaisayangkat ti imbestigasion ta ti met bangkay ti mapapati nga immuna a tinaming dagiti polis imbes a ti mangsalikawkaw koma kadagiti posible a rimmuaran dagiti suspek.

“Adu dagiti rimmuar a sao-sao mainaig iti napasamak… isu a masapul ti nainget nga imbestigasion tapno masolbar ti kaso,” kinuna ti gobernador.

Kanaig daytoy, impaganetget ni Partible ti naing-inget a kampania maikontra iti krimen nangruna dagiti nakainbolbaran dagiti armado a tattao a riding in tandem idinto a kiniddawna ti pannakitinnulong dagiti amin a sektor ti komunidad para iti pannakatagiben ti urnos ken talna iti probinsia.

Kinuna ni Partible nga ad-adu pay a checkpoints ti maipasdek kadagiti nadumaduma nga ili tapno adda pagaripaan dagiti dakes nga elemento nga agisayangkat iti krimen.#