Footer

Semana Santa: Ti Siete Palabras Iti Uppat A Dekada (Maudi iti tallo a paset)

5. “Ibagak kenka daytoy: ita nga aldaw, makipagyankanto kaniak idiay Paraiso” (Lucas 23:43)

Napasamak daytoy idi pinabpabainan ti maysa kadagiti kriminal a nailansa ni Jesus, ket kunana pay: “Saan kadi a sika ni Cristo? Isalakanmo ngarud dayta bagim ket isalakannakami met!”

Ngem binabalaw ti kaduana a kriminal a nailansa: Kuna daytoy: “Awan kadi a pulos ti panagbutengmo iti Dios?  Agpapadatayo amin a madusdusa. Rebbengna nga agsagabata gapu iti inaramidta. Ngem awan dakes nga inaramid daytoy a tao. Kalpasanna, kinunana ken Jesus,  “Laglagipennak, Jesus, inton umayka a kas Ari.” Ket insungbat met ni Jesus: “Ibagak kenka daytoy: Ita nga aldaw, makipagyankanto kaniak idiay Paraiso.”

Naggandat dagiti di nakabael a mangbuybuya iti nakabayog iti padeppa. Nangirasda. Inwarasda dagiti lampara. Ti aglawlaw ket pinaraniagda. Ngem nausigda a kriminal. Nagpukawda. Naipalnaawda. Kardinal a basol ti panangisubli kukua toy ina? Ti narangrang a lampara, tinakkabanda iti salop, binarengbarengda. Nanglangeb aglawlaw. Kumurikor dagiti saibbek ken saning-i. Balinsuek a krus ti nagmarka kadagiti muging iti kuddot ti rabii.

6. “Nalpasen.” (Juan 19:30)

Kalpasan a naramanan ni Jesus daydi naalsem nga arak, daytoy ti imbagana. Nalpasen. Nailansan. Naibayogen. Naibayogen, appok ida. Agluplupias siliasi a kakauden dagiti nangosina. Mapili dagiti mabsog, dagiti tian a bumbumsog, abunaw sagana iti punsionan dagiti didiosen a butiog.

7.“Ama, kadagita imam,  yawatko ti espirituk. (Lucas 23:46)

Nasaona daytoy iti maudin a kanitona. Ta kalpasan a naisawangna daytoy ket nauyos metten ti angesna.

Iti intay panangbasa kadagitoy maudi a balikasna, kagiddan koma met ti intay pananglagip ken panangmeditasion iti panagrigrigat ni Jesus iti maudi a kanitona. Agsagsagaba met ti ina nga ili.

Daniw a linablabba, binigao ken naisarukang ngem di makapudnot’ lualo ti inkam panaggatang. Nabileg la unay dagiti nasalapon toy ina; ti inanger a bagbagutot immarasaw latta danumna. Nagibitinkami, nangiplatito pay pinitpit iti paradipad dagiti tawa, ngem di nagbuteng, inillekan ketdi dagiti aswang dagiti bawang. Nagwarsikami iti bagas-diket iti sumipnget ngem sinippaw dagiti atros sada inluto iti bangat’ kibbaan. Inuttotan dagiti bakes kumalkalawikiw nga asuk anglem ket immadu dagiti agnannana a gaddil toy ina. Inabungotanmi manto sarmingmi, ngem rapas dagiti salibadiok rinamesda dagiti birhen a kabakiran ket simmalog dagiti atap a flashflood ken landslides. Napirpirsayen nagmurengan nga ibautbautmi iti pamayor nga adigi ngem di agawid dagiti muging a nagwalang. Naan-annongan kunada, pinekpekkelanda iti nakaugotan-anges a kawes ngem ti nabungkong a sigsiglotan inda kinurimes. Nagangon dagiti bulong mangga a naiyubon iti matat’ sabot iti ngatoen kasuoran ngem di latta a maalaw-masubbot ti kararuat’ ina nga intubongda iti kalinyas sumasapo-sumasapot…

Appok ida, ti as-asug ina ti nanginaw rebolusion kadagiti dakulapyo. Kadagiti dakulapyo a maipasngay kabarbaro nga agsapa. Kadagiti dakulapyo a mapasag panagilansa-panagipadeppa. Kadagiti dakulapyo a mapuoran dagiti dakes a ruot iti kapagayan. Kadagiti dakulapyo a maluktan kalinias panagungar toy ina. Denggen ken ipangagyo ta agsakbay maarus pay. Pespesenyo dagiti inigad iti unibersidad, isaang iti siliasi iti panagkikinnammayyammet, paburken a nalaing tapno mailasin dagiti ladek ket ti lanat’ namnama ken dur-asan isapsapo kadagiti sugat naidasayen nga ina tapno agungar. Kangrunaanna, diyo badbaddekan dagiti tugot dagiti lussok a sapatos iti napalabas uppat a dekada. Pettakenyo bangat’ atang iti lulonanna ket kautenyo kabarbaro a naganna iti sirok latok ta dakayot’ salbar toy inayo nga agtutuok…

Saksi toy kaunggan ti siete palabras iti naglabas uppat a dekada…#