Footer

Umuna a leg ti Liga Pilipinas, naangay iti Ilocos Sur

STO. DOMINGO, Ilocos Sur – Ti probinsia ti Ilocos Sur ti nagsangaili iti umuna a leg ti maika-5 a conference ti Liga Pilipinas, maysa kadagiti amateur league ti ay-ayam a basketball iti pagilian a naangay iti Sto. Domingo People’s Coliseum a nangrugi idi Abril 28.

Ti nasao a coliseum ti home court ti Ilocos Sur CS Tigers, babaen ti panangimaton da Gov. Luis “Chavit” Singson ken Vice Gov. Deogracias Victor Savellano.

Immun-una ngem daytoy, naipresentar dagiti basketbolista a nangbukel kadagiti uppat a team nga agsasango iti umuna a leg bayat ti press conference a naangay iti kapitolio probinsial idi Abril 27 a dinar-ayan dagiti opisial ti Liga Pilipinas, dagiti team owners, managers ken dagiti opisial ti probinsia ti Laguna (Golden Lions), General Santos City (MP Wariors), Cebu City (M Lhuillier Kuarta Padala Niños ken Ilocos Sur (CS Tigers).

Segun ken ni Rico Meneses, chief operating officer ti Liga Pilipinas,  maysa a wagas a panangitandudoda iti regional basketball ken panangiyasidegda ti  basketball iti komunidad ti liga a binuangay ni sigud a PBA Commissioner Noli Eala ta iti format, agtalinaed iti host province dagiti team iti las-ud ti uppat nga aldaw para iti inaldaw a panagay-ayam tapno maiyasideg kadagiti fans dagiti idoloda a basketbolista.

“Gapu ta amateur league daytoy, maisurot ngarud dagiti pagalagadan iti FIBA. Addaan iti ad-adayo a 4-point area, addaan iti no charge zone ken sangapulo a minutos ti oras ti tunggal quarter. Kayattayo met nga ipakaammo nga adda  mapili a champion iti tunggal leg santo mapili ti supeg leg champion sa kalpasanna, addanto maideklara a conference champion,” inlawlawag ni Meneses.

Kas maibatay pay iti pagalagadan, tunggal team, masapul a walo a players ti agtawen iti 29 agpababa, uppat ti agtawen iti tallopulo agpangato  (a mabalin nga ex-pro dagitoy) ken mabalinna ti mangala iti 2 a Fil-foreigner.

Maipalagip a sipud pay narugian ti United Regional Basketball Association, nabuangay ti Ilocos Sur Snipers team ti probinsia ket nagbalin daytoy nga Ilocos Sur Bravehearts iti umuna a conference ti Liga Pilipinas sakbay a nagbalin a CS Tigers itoy a tawen.

“Kayattayo met ti tumulong tapno makadiskobretayo kadagiti lokal a talento a mabalintayonto nga ipasango iti nangatngato pay a liga iti masanguanan isu a malaksid iti panangsangailitayo iti liga, nabuangay pay ti bukod a team ti probinsia. Agbalin payen daytoy a maysa a wagas tapno maitandudo ti probinsia iti nadumaduma a lugar a pakaangayan ti ay-ayam,” kinuna ti gobernador.

Dagiti sumaganad dagiti players ti Ilocos Sur CS Tigers:  Warren Ybanez, Chito Jaime, Marvin Agacer, John Moises Gonzales, Ismael Junio, Arnold Sta. Maria, Ralph Alfred Gali, Chris Santos, Ramsey Williams, Marvin Graevel, Erwin Sta. Maria, Ariel de Castro, Jemal Vizcarra ken Galen Cacha.

Ni dati a PBA player Johnedel Cardel ti head coach ken ni Richard Michael ti team manager.# (Mancielito S. Tacadena)

Comments are closed.