Footer

Balasang, namindua a rinames ti ulitegna

BANTAY, Ilocos Sur – Awan ti dakes nga aramid a dinto maibutaktak.

Uppat a bulan a nagulimek ti maysa a balasang ngem impudnonan ti napasamak gapu ta mapapati a saanen a mailinged ti bunga ti panangrames kenkuana ti mismo nga ulitegna.

Nagpulong iti polis ni Rosanna Pichay y Tababa, 18, kaduana dagiti dadakkelna a da Vicente Pichay y Cabaldera, 58, ken ni Filomena Pichay y Tababa, 57, ken ni Barangay kapitan Perfecto Madriaga, agpapada a residente iti Barangay Cabusligan,  a seksual nga inabuso ti ulitegna a nainaganan Casimiro Tababa, Jr. y Canor, 37, naasawaan, mannalon ken kalugaranda met laeng.

Iti panagpalutpot dagiti polis, mapapati a rinames ti suspek ti biktima iti namindua a daras.

Segun iti biktima, immuna a napasamak ti pannakaramesna idi alas 8 ti rabii ti Disiembre 6, 2010 idi napan iti balay ti lelangna tapno maturog sadiay.

Mapapati nga inawagan ti suspek ti biktima ket kalpasan ti panangparuarna kadagiti tallo nga annakna, inserrana ti ridaw sana inabuso ti biktima.

Mapapati a nagpaarayat ti biktima ngem binallaagan ti suspek a papatayenna no ipudnona ti napasamak.

Naulit ti panangrames ti suspek iti biktima idi alas 8 ti rabii ti Enero 5, 2011 idi napan inikkan ti biktima ti lelangda iti kanenna.

Kinuna ti biktima nga inawagan ti uliteg ket tumaray koman ngem naiggaman ti suspek ket inulodna nga inyuneg iti balay sana inabuso.

Binutbuteng manen ti ulitegna a patayen daytoy no agpulong, segun iti biktima.

Inaresto dagiti polis ti suspek sada impan iti police station para iti pannakapalutpotna mainaig iti pulong kenkuana.

Naipan met ti biktima iti Gabriela Silang General Hospital para iti mediko legal a pannakaeksamenna.#

Comments are closed.