Footer

Positibo a resulta ti panagimbestigada iti pammapatay, naibilin iti hepe ti polis ti Magsingal, Sto. Domingo

CAMP ELPIDIO QUIRINO, Bulag, Bantay, Ilocos Sur – Imbilin ni OIC Provincial Director Police Senior Supt. Reynante Partible ti panangisubmite ti hepe ti polis ti Magsingal ken Sto. Domingo ti kaudian a report mainaig iti inwayatda a panagimbestiga kadagiti pammapatay a naisayangkat iti lugar a responsibilidadda.

Impaulog ni Partible daytoy a pammilinna iti sanguanan ti naisayangkat a pammapatay iti sanguanan ti Trisha Parlor a masarakan iti Barangay San Basilio, Magsingal idi Mayo 2 a nakagudasan ni Melecio Uniana y Pascua, 55, naasawaan;  ti pannakaiwalang ni Eusebio G. Virtudes y Soliven, 49, naasawaan, mannalon, a nasarakan ti bangkayna iti kataltalonan iti Sitio Danglas, Barangay Labut, Magsingal, Ilocos Sur idi agsapa ti Mayo 1; ken ti panagtambang iti national highway a sakup ti Barangay Parada, Sto. Domingo, Ilocos Sur a naisayangkat idi Mayo 8 a nakapasagan ni Eleuterio Tubon y Tubon, 59, balo ken residente iti Barangay Napo, Sto. Domingo, Ilocos Sur.

Imbilin ni Partible ti panangipakat dagiti nasao a hepe ti polis amin a kabaelanda a mangsolbar kadagitoy a pammapatay ken iti pannakabigbig dagiti suspek a nangisayangkat kadagitoy a krimen.

Nailanad pay iti pammilin ti panangisubmite dagiti COP iti positibo a resulta ti inwayatda nga aksion para iti pannakasolbar dagiti nasao a krimen tapno “maipaneknekda (COP)  a maikarida a law enforcer a naasignaran iti lugar a hurisdiksionda.

Imbilin ni Partible ti panangisubmite dagiti COP iti resulta iti inwayatda nga aksion iti provincial police office iti kabiitan a posible a tiempo.#

Comments are closed.