Footer

2 paltog, bomba, balbala nakumpiska dagiti polis iti insayangkatda a panagsukisok

STA. MARIA, Ilocos Sur – Dua a lawas kalpasan ti panangibilin ti Commission on Elections ti pannakaipakat ti gun ban iti intero a probinsia maigapu iti maangay nga special elections para diputado iti umuna a distrito ti Ilocos Sur, insayangkat ti kapolisan ti panagsukisok iti pagtaengan iti lima a masuspetsa nga agtagikua kadagiti armas iti Barangay Tangaoan ditoy.

Dua a paltog ken nadumaduma a balbala ti nakumpiska dagiti nagtitipon nga elemento ti RID, PROI, rpsb1, ppsc, Ilocos Sur PPO, Sta. Maria police station ken ISCIDT nga impanguluan ni Police Senior Inspector Silverio Ordinado, Jr. ti RID, PRO1 ken iti direkta a superbision ni Senior Supt. Mariano Luis M. Verzosa, Jr. iti balay da Rogel Gambon, Paulino Gambon, Arsenio Castillo, Ben Ancheta ken Francisco Doctolero, agpapada a residente iti Barangay Tangaoan ditoy nga ili.

Ni Judge Francisco Ante, Jr. ti Municipal Trial Court for Cities, Vigan City ti nagpirma iti search warrant a napetsaan iti Mayo 7.

Negatibo ti resulta ti panagsukisok dagiti polis iti balay da Paulino Gambon ken Ben Ancheta.

Nakakumpiska dagiti polis iti balay ni Rogel Gambon iti maysa a carbine rifle (M1), 20 a kapsula ti Cal. 45, maysa nga awan naggianna a magasin ti carbine rifle, 5 a bala para carbine rifle, maysa a bala para Cal. 380, maysa a bala para Cal. 5.56 ken 7 a bala para Cal. 45.

Nakakumpiska dagiti polis iti balay ni Arsenio Castillo iti 13 a bala para Gauge 12 shotgun, 9 a bala para Cal. 22, maysa a bala para Cal. 7.62 (M14), maysa a bala para cal. 5.56 (M16), maysa a bala para Cal. 45, maysa a bolt para M16 rifle, maysa nga awan naggianna a magasin para 9 MM, maysa a coil spring para Cal. 45, 2 kapsula para Gauge 12 shotgun ken 2 kapsula para Cal. 22.

Nakasamsam met dagiti polis iti balay ni Francisco Doctolero iti 15 a bala para Cal. 38, maysa bala para 9 MM, 2 bala para M16, maysa a bala para Cal. 30 (carbine), 5 a bala para Cal. 45, 3 MK 2 fragmentation grenade, maysa a magasin para Cal. 45, maysa a long magazine para M16, maysa a Cal. 38 Colt, maysa a bandolier, ken 3 a kapsula para Cal. 38.

Naipan dagiti suspek agraman dagiti nakumpiska nga armas ken balbala iti police station ditoy para iti dokumentasion ken umisu a disposision.

Kabayatanna, dua a paltog ti naisuko iti polis itay nabiit iti Sugpon ken Candon City.

Boluntario nga insuko ni Celia Cudao, 48, housekeeper ken residente iti Barangay Poblacion, Sugpon ti maysa a homemade Cal. 38 revolver a nagkarga iti innem a bala ken ni Barangay Kagawad Reynante Lasong y Dangle, 39, residente iti nadakamat a barangay idi Mayo 14.

Insuko met ni Lasong ti nasao a paltog iti polis.

Iti sabali a damag, insuko idi Mayo 12 ni Barangay Captain Ruiz G. Valdez ti Paypayad ditoy ken ni Police Supt. Marlo Castillo, hepe ti polis, ti maysa a Cal. 45 Armscor nga addaan iti magazine clip a naglaon iti walo a bala.

Segun iti barangay captain, insuko met ti maysa a kalugaranna ti nasao a paltog.

Kinuna ni Castillo a resulta daytoy ti agtultuloy a kampania ti kapolisan ditoy maikontra iti panagraira ti paltog ditoy siudad.#

Comments are closed.