Footer

Barangay tanod, nabagsol, natay

STA. CRUZ, Ilocos Sur – Malas ti Biernes 13 iti maysa a barangay tanod ta nabagsol iti daytoy nga aldaw a puon ti ipapatayna.

Saanen a naiyabot iti ospital ti biag ni Dariel Cuello, 21, barangay tanod ken residente iti Barangay Pattiqui ditoy nga ili kalpasan a binagsol ti maysa kadagiti inanawana nga agririri iti lugarda idi malem ti Mayo 13, Biernes.

Iti inisial nga inbestigasion dagiti polis, adda saan a panagkikinnaawatan ti grupo da Rommel Cuello, 26, naasawaan, ken Benjie Cuello, 21, baro, agpada a residente iti nadakamat a barangay ken ti grupo da Demosthenes Dauz ken Ronnie Boy Limos bayat ti kaaddada iti Sunset Beach Resort ket napan naganawa ni Dariel Cuello ngem maysa iti grupo ni Dauz ti mapapati a nangbagsol kenkuana.

Naimbitaran dagiti dua a grupo iti estasion ti polis para iti pannakapalutpotda malaksid kada Ronnie Cardenas ken Arnold Talino a saan a mabirokan dagiti polis.

Segun iti maysa a saksi, mapapati nga inannugot ni Cardenas nga isu ti nangbagsol iti tanod.#

Comments are closed.