Footer

EDITORIAL: Dakkel a pakaupayan ti kapolisan

Maysa a damag ti nakaawis iti imatangtayo itay nabiit, ti saanen a pannakaipila ti kaso maikontra iti maysa a lalaki a natiliwan a nangitalaw iti motorsiklo agsipud ta nagpirma iti affidavit of desistance ti akinkukua iti motorsiklo a saanen nga interesado pay a mangidarum iti suspek. Taltalek pay daytoy a lalaki ta nalisianna ti pannakadusa iti baet ti panagsalungasingna iti linteg.

Adda pay daydi kaso ti pammapatay a natiliwen ti suspek, adda pay saksi a nangitudo kenkuana ngem nagtungpal a nawaswas ti kaso agsipud ta iti di ammo a rason, saan metten nga intuloy ti biktima ti darumna.

Saantayo a mababalaw dagiti biktima no dadduma. No agdarumda pay, aggastoda iti abogado. Mataktakda pay ta kapilitan a mapanda iti husgado tunggal hearing. Apay pay laeng nga agdarumda ket napasublida ti natakaw kadakuada, wenno nangted metten ti suspek iti kantidad a kas sukat  ti biag a kinettelna?

Ngem mariknami ti naulimek a panagngaretnget dagiti ngipen dagiti pannakabagi ti linteg kadagiti kastoy a mapaspasamak. No maysaka a polis, makariknaka la ketdi iti nakaro a pannakaupay ta nagpatingga laeng iti angin ti panangipakatmo iti linteg, a posible pay a pakaipasungalngalan ti biagmo no pilien ti suspek ti makirupak idi tiliwem. Kinapudnona, maysa nga am-ammomi nga opisial ti di nakaibtur a nangibatad iti dakkel a saning-ina mainaig iti daytoy.

“Adu rigatmi a naguk-ukkon iti ebidensia. Adu a rigatmi a nangipakat iti surveillance iti suspek. Sa ita, awan ti pagmamaayan ti inaramidmi agsipud ta awan metten ti pagbatayanmi iti pannakapukaw ti interes ti biktima nga agdarum,” insaning-i ti nasao nga opisial.

Iti sabali a bangir, no saan a matiliw a dagus dagiti polis dagiti suspek a nagaramid iti maikaniwas, isuda ti sentro dagiti pammabalaw. Mabatoda kadagiti kritisismo nga inutilda, awan ti kaes-eskanda, saksaklotenda laeng ti tianda ken dadduma pay a makapasakit a balikas.

Iti biangmi, saan a patas ken maikanatad daytoy kadagiti polistayo. Rumbeng laeng a no naglabsing ti maysa a tao, maipakat ti linteg kenkuana, uray awanen ti interes ti biktima a mangidarum kenkuana. Ngem kasano?

Kasapulan nga ipaayan dagiti agilinlintegtayo iti naun-uneg a panagsukimat dagiti agdama a lintegtayo tapno maamendaran wenno mabaliwanda tapno maipakat ti pannusa kadagiti nagbasol uray saanen nga interesado dagiti biktima. Iti kastoy laeng a wagas a saan nga agtungpal a pakaupayan ken pagsaning-ian ti kapolisantayo.#

Comments are closed.