Footer

Mannalon, napaltogan bayat ti pannaturogna

CABUGAO, Ilocos Sur – Maysa a mannalon ti napaltogan ditoy nga ili idi Mayo 14 idinto a sabali pay a mannalon iti Sta. Catalina, Ilocos Sur ti inaresto dagiti polis idi Mayo 15 gapu iti panagpaputokna iti baet a maipakpakat ti gun ban ditoy probinsia.

Iti report manipud iti polis ditoy, napaltogan ni Hadji Tisbe y Laurente, 29, naasawaan, mannalon, ken residente iti Barangay Daclapan ditoy nga ili bayat a matmaturog iti kalapaw a naipatakder iti lauden ti family house ni baketna idi agarup alas 11:50 ti rabii ti Mayo 14.

Simrek ti bala iti agongna sa rimmuar iti makannigid a pingpingna.

Naitaray ti biktima iti Suero Clinic and Hospital para iti pannakatamingna a medikal idinto a naglibas ti di pay nabigbig a suspek, kuyogna ti paltogna a mapapati a cal. 45 kas maibasar iti maysa a kapsula ken maysa a buli a nasarakan dagiti inbestigador iti nakapasamakan ti krimen.

Di pay ammo ti motibo ti pammaltog.

Kabayatanna, inaresto dagiti polis-Sta. Catalina ni Eliseo Rabara y Raganit, 25, baro, mannalon ken residente iti Barangay Sinabaan, Sta. Catalina, Ilocos Sur gapu iti panagpaputokna iti paltog idi agarup alas 4:00 ti malem ti Mayo 15 iti nadakamat a barangay.

Mapapati a nabartek ti suspek ket naglaawlaaw ken nagprobokar sana pinaputok ti paltogna a Gauge 12 homemade buckshot.

Kinumpiska dagiti nagresponde a polis ti paltog ti suspek ken nakarekobreda iti dua a kapsula sada kinustodia ti suspek.#

Comments are closed.