Footer

P150 pantawid pasada, maited tricycle operators

CABUGAO, Ilocos Sur – Maikkan dagiti operators dagiti traysikel ditoy nga ili iti tulong  gapu iti panagngina ti presio ti lana iti world market.

Maysa a surat ti impatulod ti Department of Interior and Local Government iti sangguniang bayan ditoy a nakaipalaonan ti programa ti administrasion Aquino a mangipaay iti tulong kadagiti tricycle operators ditoy nga ili iti babaen ti Public Transport Assistance Program (PTAP) wenno pantawid pasada iti sanguanan ti kinangina ti presio ti gasolina maigapu kadagiti riribuk iti Middle East.

Kanaig daytoy, insingasing ni Konsehal Dr. Carlito Pano iti sangguniang bayan ti panangited iti otoridad ken ni Mayor Edgardo Cobangbang nga agpirma iti memorandum of agreement iti DILG  para iti pannakaited ti nasao a fuel subsidy kadagiti operators ti traysikel ditoy nga ili.

Ngem kinuna ni Pano a kasapulan a masukimat pay nga umuna no napabaro met laengen ti rehistrasion ken prangkisa dagiti nasurok 900 a tricycle operators a nairaman iti listaan ti DILG a maikkan iti nasao a fuel subsidy.

Indagadag ni Konsehal Richard Alcid, chairman ti committee on transportation, ti pannakaaprobar ti nasao a gakat ngem nagtungpal a napagtitinongan nga agdalan pay daytoy iti maikadua ken pinal a pannakaibasana sakbay a maaprobaran.

Impaulog idi napan a bulan ni Pres. Benigno Aquino III ti Executive Order No. 32 a mangipasdek iti Public Transport Assistance Program wenno “Pantawid Pasada” nga inisial a nailatangan iti P450 milion a pangtulong iti apektado a sektor ti transportasion gapu iti kinangina ti presio ti gasolina.

Kas sagudayen ti nasao a programa, maikkan iti subsidy dagiti drivers ken operators dagiti nakarehistro a dyipni ken traysikel iti pagilian babaen ti “smart cards” nga iwaras ti Department of Energy babaen ti koordinasion ti Land Transportation Franchising and Regulatory Board (LTFRB).

Addaan tunggal smart card iti load a P1,050 wenno P35 tunggal aldaw a maited a kas pantawid pasada kadagiti rehistrado a public utility jeepney (PUJ) idinto a makikoordinar ti DILG kadagiti local government units para iti pannakaipaay ti P150 wenno P5 tunggal aldaw kas fuel subsidy kadagiti nakarehistro a tricycle operators.

Agdama nga ad-adalen ti gobierno no kasano a mairaman dagiti mannalon ken mangngalap a benepisario iti daytoy a fuel subsidy program ti administrasion.#

Comments are closed.