Footer

SARITA: Mar Plogo, Mediaman (Maikatlo a paset)

Pangngaldawen iti sumaruno a bigat ti iruruarmi iti hotel tapno mapankami iti megamall. Intawag itay ti sekretaria ti gobernador nga agkikitakami iti alas tres ngem sinapamin ti nagrubuat ta iti ruar laengen ti pangaldawanmi ta nalaklaka ngem iti mangan iti restaurant ti hotel. Nagdiretsokami iti McDo.

“Agorderkayon ta innak man diay CR,” immandar ni Mar. Ammok a taktikana manen daydiay tapno saan nga umasut.

“KKB tayo pay laeng a,” impasaksakkon ta masemsemakon iti kinalaingna a manggundaway.

“Ikkatemton iti ited ni Gob madamdama. Sikanto met la ti pangiyawatan ti sekretariana,” insungbatna ket medio agpaspasikkil a naglayon iti CR. Ania ngarud pay kapilitan a siak manen ti napatudon nga aggasto.

“Igatangam lattan iti french fries. Agruam metten,” kinuna ni Boggie.

“Igatangam ketdi ti lungat iti dina makmakan ta bareng maimpatso,” kinunak ket inyawatko ti nabukel a sangaribu. “Bayadamton ta innak man la umisbo.”

Addaakon iti batog ti ruangan ti CR idi lukatan ni Mar. Agkalkaling-etan ti diaske.

“Dika la agtultuloyen a sumrek, Yoyong,” medio namigerger pay ti timekna idi gandatek ti sumrek.

“Apay aya. Itayak pay la a makaisbo,” inkusilapko ta iparitna metten a sumrekak iti CR.

“Adda latta kenka a ading,” kinunana ket intarusnan ti nagtugaw iti maysa kadagiti lamisaan. Kasla agkakapsut pay laeng. Pumpunasanna iti panio ti agludingasen a mugingna.

Urayak la napasanud idi makitak ti napasamak iti uneg ti CR. Agub-ubo ti deposito idinto a nabisak ti tengnga ti bowl. Nalabit minasngaadan itay ni Mar ket saanna a nakabaelan ti dagsenna itay ipuersana ti agiddek isu a nagkaduan. Anian ti lawlaw-ankon a simrek. Isu met la gayam a saannak a kayat a pastreken itay. Nayaw-awan payen tay iyiisbok.

Dandani diak nalapdan ti agpaggaak idi sisasangokamin iti lamisaan. Mayaten ti panagngusabna iti spicy chicken a kasla nalipatannan ti dinadaelna iti uneg ti CR. Ay sigurado a di mateppelan ni Boggie ti agkatawa inton iyarasaasko kenkuana ti nakitak.

Imbes a naragsak koma ni Mar ta inteden ti sekretaria ti alawansmi nga idi pay la kalman nga iyur-uraymi, nasidunget ketdi ti rupana idi inyawatko ti apagna.

“Apay ngay a basbassit kaniak?” inkusilapna ket lalo pay nga immuneg dagiti kasla sibeg a matana.

“Ne! ket ania ngaruden, boss, dimin ikkaten tay inyabunarmi iti hotel ken tay pinangaldawtayo? Sa ‘toy nabati isu ti ibayadtayo manen iti hotel ta mano pay nga aldaw satayo agawid,” diak impadlaw ti rurodko.

“Kinissayam koman a tay intedmo ken ni Boggie. Imbag kaniana ta adda sugar mommyna.”

“Ne madi daytan a, boss. Lamangam met ta kaduatan. Apay, kasta ti ub-ubraem no sika ti pakaiyawatan ti alawans?” sarkastiko itan ti sungbatko.

“Ay, saan laeng,” natamnay ti sungbatna ket inlayonnan ti rimmuar a nagturong iti parking lot.

Ti la bagbagina ti ammona a talaga daytoy a Mar. Saan a daytoy ti immuna a gundaway a kissiimannak no kasta a siak ti pakaiyawatan ti alawans manipud iti gobernador. Adda daydi gundaway a nakaawiden dagiti reporter manipud iti nadumaduma nga estasion ti radio ken telebision idi maited ti pannaka-talent fee kalpasan ti presscon iti kapitolio. Siak ti nangitalkan ti sekretaria a mangiwaras iti kuarta. Idi inyawatko ti sangailgat ni Mar, imbaganan a lima gasut la ti itedmi iti tunggal maysa ta pagguduaanmin ti dadduma ngem diak immannugot. Nupay kasta, intedko ti apag da Marlon ken Demy ti DZPT Manso Radyo ta isunton ti mangted ngem anian a babawik idi ibagana a saannan nga ited daytoy kadagiti maseknan.

“Ta apay a saanmo koma nga idanon?” dinamagko.

“Huh! No di payen ited ni Marlon tay inkarina a bayad ti panagreportko iti kada aldaw diay estasionda. Isu daytoyen a ti sukatna,” insungbatna ketdin.

Iti naminsan a nagawis iti music bar ti gobenador idi insurotnakami manen iti Manila, kastoy manen ti inubrana ngem diak latta immannugot. Nangibati idi ti gobernador iti uppat a ribu ta immun-una a rimmuar. Sinurotnak a dagus iti CR idi napanak immisbo ket imbaganan a pagbingayanminto ti surokna ket dimin ibagbaga iti drayber ken cameraman a kaduami.

(Adda tuloyna)

Comments are closed.