Footer

Awan opisial a kandidato ti LP iti special election; prov’l chair

VIGAN CITY – Awan ti opisial a kandidato ti Liberal Party iti special elections para iti diputado a mangibagi iti umuna a distrito ti Ilocos Sur, daytoy ti inlawlawag ti provincial chairman ti nasao a partido sumagmamano nga aldaw sakbay ti pannakaangay ti eleksion.

Kinuna ni Vigan City Councilor Franz Ranches a nupay nupay adda napasamak a panagtataripnong dagiti kameng ti partidoda para iti posible a panangpilida iti kandidato ti grupo ngem awan ti nagpinalanna isu nga awan ti opisial a kandidato ti LP iti special elections.

“Adda naaramid a shortlist ngem awan ti nagpinalanna,” innayon ni Ranches.

Nagbalin a nabara nga isyo iti eleksion ti panangaramat ni Atty. Trandy Baterina iti logo ti LP ken ti ladawan ni Presidente Benigno Aquino III kadagiti postersna idinto nga awan ti nailanad a partidona idi impilana ti sertipiko ti kandidaturana iti Commission on Elections.

Ngem iti interbio ti media ken ni Ranches, kinunana nga iti pagaammona, awan ti inyendorso ti LP a kandidatona iti special elections sana innayon nga iti biang ti LP Ilocos Sur, itedda ti suporta ken ni Singson.

Pinasingkedan ni Ranches ti suporta ti partidoda idi intag-ayna ti ima ni Singson kalpasan ti maysa a press conference a naangay idi Mayo 25, tallo nga aldaw sakbay ti maisayangkat nga special elections.

Inlawlawag pay ti provincial chair a desision dagiti adda ditoy lokalidad ti panangsuportada ken ni Singson a saan ketdi a nasken a naggapu daytoy iti nailian a partido.

“Dayta ti makunkuna a local political dynamics.Maysa pay kayatko a malawlawagan a sabali ti party nomination iti party endorsement. Iti pagaammok, awan ti inyendorso ti LP a kandidatona itoy nga special elections,” kinuna ni Ranches.

Pinagyamanan met ni Singson ti suporta ti LP kenkuana ket kinunana a daytoy ti mangipakita iti talekda iti lideratona a mangirepresentar iti umuna a distrito sadiay Kamara. (Mancielito S. Tacadena)

Comments are closed.