Footer

BANNER NEWS: 5 COPs rinelibo ti provincial director kas pammilin ti Comelec

BANTAY, Ilocos Sur – Sumagmamano nga aldaw sakbay ti espesial nga eleksion a pakabutosan ti kandidato para iti nabakante a puesto ti diputado iti umuna a distrito ti Ilocos Sur, lima a hepe ti polis ti narelibo iti puestona babaen ti pammilin ti Commission on Elections.

Impakaammo ni OIC Provincial Director Reynante Partible a rinelibona ti hepe ti polis ti San Juan, Magsingal, San Vicente, Bantay ken Caoayan kas panagtungpal ti provincial police office nga idauluanna iti pammilin a naggapu iti Comelec Manila.

(Flash report: Naglayus ti butos ni Vigan Vice Mayor Ryan Luis Singson kadagiti sangapulo  nga ili ken maysa a siudad iti umuna a distrito ti Ilocos Sur iti espesial nga eleksion para iti nabakante a puesto ti diputado iti First District ti probinsia a naangay idi Mayo 28. Nakagun-od ti inaudi a kabsat ni sigud a diputado Ronald Singson iti 71,955 a butos kontra iti kinabalubalna a ni Atty. Trandy Baterina a nakaala met iti 30,445 a butos wenno diperensia a kadagupan a 41,510 butos. (Ed)

Narelibo ni San Juan COP Police Senior Inspector Pedro Villalon, P/SInsp. Arsenio Ramos (Magsingal), P/SInsp. Esteban Pastor (Bantay), PI Nilo Racoma (San Vicente) ken P/SInsp. Edmar Quiton (Bantay).

Iti pannakipatang ni  Partible iti media, imyunay-unayna a nasayaat ti performance dagiti nadakamat a hepe ngem binalasana ida kas panagtungpal iti pammilin a naggapu iti Comelec.

Imbilin ti poll body ti pannakarelibo  dagiti nasao a hepe ti polis kas kiddaw ni Atty. Trandy Baterina, kandidato para diputado iti umuna a distrito.

Kasango ni Baterina ni Vigan City Vice Mayor Ryan Luis Singson, anak ni Gov. Luis “Chavit” Singson iti daytoy nga eleksion a pakapilian iti mangsukat ken ni dati a Congressman Ronald Singson a naglusulos iti puestona kalpasan a sinentensiaan ti Hong Kong court a mabalud iti makatawen ken innem a bulan gapu iti panagikutna iti droga.

Kinuna ni Partible a temporario nga aggian dagiti maseknan nga opisial iti provincial police office bayat ti campaign ken election period.

Nangdutok ni Partible iti officer in charge dagiti nadakamat a police stations agingga iti malpas ti eleksion.

Ngem iti immun-una nga interbio ken ni Gov. Luis “Chavit” Singson, kinunana a dina sinupiat ti pannakasukat dagiti hepe ti polis tapno di maibaga ti kampo ni Baterina nga adda linoloko a mapasamak iti eleksion.

Kinuna ti gobernador nga uray inaldaw a masuktan amin dagiti hepe ti polis ken dagiti amin a polis iti probinsia, isunto met la ti rummuar a resulta ti eleksion a mangabak ti anakna.

“Uray pasukatanda nga inaldaw dagiti chief of police ken uray amin a polis iti probinsia, mangabak latta ni Ryan,” kinuna ti laklakay a Singson.

Kinuna met ni Vice Mayor Singson a mangabak iti eleksion agsipud ta suportaran dagiti amin a mayor iti umuna a distrito ti probinsia.#

Comments are closed.