Footer

KOMENTARIO: Propeta, nadanuman a tukak a gumanakgak

No madanuman dagiti tukak, kasta unay a gumanakgakda. Pudno la unay daytoy. No maminsan, maiyarigda kadagiti agkunkuna a propetada ken dadduma pay. Ngem makasusugel met ken makasimron ti karibuso ken ganakgakda; ket no mamatika kadakuada, naappananka metten kadagiti gitada. Maiyanudkanton kadagiti nasam-it a balikasda ket sumaruno metten ti panagdawatda kadagiti donasion wenno manglimlimo a love offering. Ti nalawag ketdi, makissayan wenno makerrasan ti nagbanbannogam. Kadagitoy a panawen, nagraira manen dagitoy a self styled prophets ken doomsayers.

Sadiay Taiwan, impadto ti agnagan iti Wang Chao-hung, wenno “Teacher Wang” a mapasamak sadiay ti nakapigpigsa a gingginged a 14 magnitude scale a sarunuen ti nakapigpigsa a tsunami a pattapatta a mangpunas ti lugar iti mapa ti sangalubongan.

Gapu kadayta a ballaag ti kulto, nagipatakderda kadagiti nagkaadu a cargo makeshift shelter wenno pagnaedan a naaramid manipud kadagiti cargo containers. Nagbalin la ket ngarud a negosio ti panagaramid kadagiti pagtaengan a naaramid iti cargo containers.

Impadtona a mapasamak ti ginggined ken tsunami iti Mayo 11, 2001. Ngem saan met a napasamak ti impadtona. Im-imbestigaranen dagiti otoridad ti Taiwan gapu daytoy nga inaramidna. Ti agdadata a kinapudno, kimmita dagiti negosiante iti housing business ken dagiti aglaklako iti cargo containers.

Kadagiti met agpalpaliiw kadagiti garaw dagiti bituen ken dadduma pay a heavenly bodies, kunada met a kanibusananen ti lubong ti panagbabatog dagiti planeta a Mars, Jupiter, Mercury, Venus, Uranus ken Neptune idi parbangon ti Mayo 13, 2011. Agsipud ta Biernes Trese, impadto manen dagiti nalaing a sumao nga adda dakkel a didigra a mapasamak.

Ngem inyik-ikkisda dagitoy makasimron a damag tapno laeng makalakoda kadagiti libroda, compact disc ken tapno nasaysayud ti panagdawatda kadagiti donasion. Dayta met laeng ket ti kangrunaan a motiboda. Nabayagen a kimmita dayta nga istratehia (marketing technique).

Ditoy met pagilian, sumangkautro a simmawsaw ti maysa a religious group a kanibusananen ti lubong iti Mayo 21, 2011. Ti rigatna, sadiay Metro Manila, agsabat dagitoy kadagiti lugan nga agiwarwaras iti polietosda. Dida pay la mapan agmula iti kamotit ken balangeg ta di ket mangparparnuayda laeng iti makapalilibeg iti naannayas a panagbiag.

Di pay imbaas ti pukkaw nga aggibus ti lubong inton Disiembre 12, 2012. Nangrugi daytoy iti panangbasa ti duogan a kalendario ti naungawen a kaputotan, ti Mayan. Wen, mamasirib dagiti Mayan nga astronomo ken mamatida unay iti garaw dagiti bituen, ti init ken ti bulan, dagiti planeta ken amin nga adda iti kalangitan. Dagitoy ti nangibasaranda iti inaramidda a kalendario. Naaramid iti pinalanas a bato daytoy dakkel a kalendarioda. Ditoy a naikitikit dagiti al-aldaw, bulbulan ken tawtawen babaen kadagiti simbolo wenno drawings. Ti rigatna, napnon ti bato ket awanen ti pagikitikitanda. Nagpatingga (kano) dayta a kitikit iti Disiembre 12, 2012. Isu a kunaen metten dagiti naalikuteg ti mugingda a gibusen ti lubong dayta a petsa.

Kasano koma no dayta pagikitkitikitanda a bato ket adda pay laeng espasionna agingga iti Pebrero 2, 2222, aggibus ti lubong kadayta a petsa? Wenno mapno dayta a kalendario agingga iti Hunio 6, 6666, agpatingga ti lubong dita?

Naggibus ti kalendario dagiti Mayan, kunada koma, saan? Daytoy ti lohika.  Agdadata nga awan ti  imbaga dagiti Mayan nga aggibus ti lubong kadayta a petsa. Awan ti makaibaga. Awan met ngaruden dagiti Mayan. Saan a ti lubong ti naungaw no di ket ti kaputotan ti Mayan.

Ketdi, agturongen ti lubong iti paggibusan gapu met laeng iti aramid ti tao a dina ammo nga ilalaen ti bukodna a taeng – ti mismo a lubong wenno Mother Earth. Gapu iti global warming, agpeggad a marunaw dagiti niebe iti north ken south pole ket ngumato ti level ti baybay a pakalnedan metten dagiti sumagmamano nga isla no di man ket nasnasion. Ngem malappedan daytoy babaen ti itutulong ti tunggal maysa a manglapped ti global warming.

Wen, agturongen iti pannakaungaw ti lubong gapu iti aramid met laeng ti tao. Gapu iti kinaadun dagiti chemical residues kadagiti dagdaga, bimmassiten ti maapit idinto ta  nagpaspas ti panagadu ti tao ket saan a balanse ti pagtinnaganna – adu ti matay iti  bisin. No adu ti agbisin tumaud ti nagduduma a krimen. Ngem malappedan daytoy. Adda akem tunggal maysa.

Aggibusen ti lubong gapu iti partuat ti tao a makaungaw a kas iti bomba nuclear, dagiti chemical ken biological warfare. Di met la agpatinggan ti tao iti panagpartuatna iti pakaungawanna ken pakadadaelan ti lubong.

Kadatayo a Kristiano, ammotayo amin (lalo kadagiti managbasa iti Biblia) nga awan ti makaammo no aggibus ti lubong. Ta  kas mabasa iti Marcos 13: 31-32, “Mapukawto ti langit ken daga…Ngem no maipapan iti idadateng dayta nga aldaw wenno oras, awan ti makaammo – uray dagiti angheles sadi langit wenno ti Anak. Ti laeng Ama ti makaammo…”#

Comments are closed.