Footer

Liberal Party: unwavering, all-out support ken ni Baterina

VIGAN CITY – VIGAN CITY – “Naigagara a panangiyaw-awan” kadagiti botante, daytoy ti reaksion ti kampo ni Atty. Trandy Baterina iti alegasion ti kasupangetna iti politika a saan nga isu ti opisial a kandidato ti Liberal Party iti special elections a pakapilian ti diputado para iti umuna a distrito.

Iti nabayadan a political broadcast ti kampo ni Baterina a naipatangatang iti Bombo Radyo idi Mayo 26, naibasa ti statement of support ti Liberal Party a napetsaan iti Mayo 23 a nangibatad ti panangited ti partido ti “unwavering and all-out support” iti kapartiduanda nga Atty. Trandy Baterina a tumaray kas official candidate ti partido para iti kinarepresentante ti umuna a distrito ti Ilocos Sur iti Mayo 28 special elections.

Sinaguday ti statement a mabasa pay iti website ti Liberal Party a “tumaray ni Atty. Trandy para iti tugaw a binakantean ni … dati a Cong. Ronald Singson, a nasentensiaan iti 18 a bulan a pannakabalud babaen ti Hongkong court kalpasan ti panangannugotna a guilty iti panangiserrek iti illegal a droga iti nasao a teritorio.”

Kanaig daytoy, kinuna ti kampo ni Baterina  a “nupay miembro ni Konsehal Franz Ranches iti Liberal Party, awan ti karbenganna a  mangitayag, mangiproklama ken mangiyendorso ken ni congressional candidate Ryan Luis Singson.

“Mamatikami nga adda nalabsingna (Ranches) ket sungbatannanto iti central office ,” kinuna pay ti kampo ni Baterina.

Kinuna ti statement a “mamati ti partido nga ibagian ni Atty. Trandy ti sinseridad, commitment ken ideals ti agpaypayso a lider ken miembro ti partido,” idinto nga innayonna a “welcome addition”  ni  Baterina iti listaan dagiti public servants ken lawmakers ti LP a mangitakder ti solidaridad ken transparensia iti pannakaiduron ti prioridad a lehislasion a mangkomplimento kadagiti prioridad a programa ni Presidente Noynoy Aquino, chairman ti partido.

“Agapelakami kadagiti 161,975 a rehistrado a botante iti umuna a distrito ti Ilocos Sur, a buklen ti 10 nga ili ti Sinait, Cabugao, San Juan, Magsingal, Santo Domingo, San Ildefonso, San Vicente, Bantay, Santa Catalina and Caoayan ken ti  siudad ti Vigan, ti pannakaadalna manipud iti padasda iti napalabas. Ikkantayo ti bagitayo iti oportunidad  a pagserbian ken ibagian ti maysa a tao a dedikado, addaan integridad, adbokasia para iti reporma, ken addaan iti puso ken panunot para iti responsive public service…. Awan panagduadua, mamati ti partido a ni Atty. Trandy Baterina ti umisu a pili,” kinuna pay ti surat.#

Comments are closed.